काठमाडौं । आगामी वैशाखको पहिलो सातामा लामो इतिहास बोकेको राष्ट्रपति रनिङ शिल्ड खेलकुद प्रतियोगिता हुने भएको छ। राष्ट्रिय खेलकुद परिषद् (राखेप) को आयोजनामा आगामी वैशाख ४ गतेदेखि ६ गतेसम्म दशरथ रंगशालामा हुने भएको छ।
सात सय ७३ वटा स्थानीय तहबाट छनोट गरिएको केन्द्रीय राष्ट्रपति रनिङ शिल्ड प्रतियोगिता हुन लागेको हो। राखेपले बिहीबार पत्रकार सम्मेलन आयोजना गर्दै प्रतियोगिताबारे जानकारी दिएको हो। सात प्रदेशबाट १८ वर्षमुनिका ६ सय ८६ खेलाडीले यस पटक चुनौती प्रस्तुत गर्न लागेका हुन्।
यो प्रतियोगितामा कुल ६ वटा खेलमा प्रतिस्पर्धा हुँदै छ। छात्रा र छात्रले एथ्लेटिक्स, भलिबल, कराँते, कबड्डी, तेक्वान्दो र उसु विधाका खेलमा प्रतिस्पर्धा हुनेछन्।
एथ्लेटिक्समा छात्रा र छात्रमा गरी समान १३ स्वर्ण, कराँते, तेक्वान्दो र उसुमा समान ६/६ स्वर्ण गरी ३६ स्वर्ण, कबड्डी र भलिबलमा समान एक स्वर्ण गरी चार स्वर्णमा प्रतिस्पर्धा हुनेछन्। यो प्रतियोगितामा सहभागी हुने खेलाडीले यातायात खर्चका साथै दैनिक १३ सयका दरले भत्ता पनि पाउने राखेपका प्रतियोगिता संयोजक मीन शर्माले जानकारी दिए।
हरेक विधामा शीर्ष तीन स्थान प्राप्त गर्ने खेलाडीले नगद पुरस्कार पाउनेछन्। यद्यपि, उनीहरूले पाउने पुरस्कारबारे भने तय नभइसकेको शर्माले जानकारी दिए। तर, तीन पटक च्याम्पियन टोलीले रनिङ शिल्ड पाउनेछन्। प्रतियोगितामा कीर्तिमान बनाउने खेलाडीले १५ हजार रुप्रयाँ नगद पुरस्कार पाउने जनाए।
यसअघि लुम्बिनी प्रदेशले तीन पटक च्याम्पियन भएपछि रनिङ शिल्ड आफ्नो बनाएपछि नयाँ रनिङ शिल्ड बनाइएको छ। प्रतियोगिताका लागि करिब एक करोड ५० लाख खर्च हुने राखेपले जनाएको छ।
