काठमाडौं । साफ यु–१६ महिला फुटबल च्याम्पियनसिपको उपाधि बंगलादेशले जितेको छ।
भारतलाई पेनाल्टी सुटआउटमा ३–२ ले पराजित गर्दै बंगलादेश च्याम्पियन बन्यो। बंगलादेश जारी प्रतियोगितामा अपराजित रहँदै च्याम्पियन बनेको हो। यसअघि बंगलादेशले समूह चरणमा पनि भारतलाई हराएको थियो।
बंगलादेशको किशोरी टोलीले आइतबार भएको फाइनलमा भारतविरुद्ध १–० ले पछि परेको अवस्था उल्ट्याउँदै बराबरी गर्दै खेल पेनाल्टी सुटआउटमा पुर्याएको थियो।
भारत र बंगलादेशबीच निर्धारित समय १–१ गोलको बराबरी भएपछि खेलको निर्णय पेनाल्टी सुटआउटबाट लिइएको थियो। साविक विजेता बंगलादेशको यो दोस्रो उपाधि हो। बंगलादेशको गोलपोस्ट सम्हालेकी इयरजान बेगमले पेनाल्टी सुटआउटमा उत्कृष्ट प्रर्दशन गर्दै भारतका तीन प्रहार रोक्दै टिमलाई च्याम्पियन बनाइन्।
त्यसअघि निर्धारित समयमा भारतले खेलको चौंथो मिनेटमा नै अनुष्का कुमारीको गोलमार्फत खेलमा अग्रता बनाएको थियो। अधिकांश समय बराबरीउन्मुख खेलमा ७१ औँ मिनेटमा बंगलादेशले बराबरी गोल फर्कायो।
कर्नरमा पाएको बललाई मरिनम बिन्ता हानाले सदुपयोग गर्दा खेल १–१ गोलको बराबरीमा आएको थियो। त्यसपछि थप गोल हुन नसक्दा खेल पेनाल्टी सुटआउटमा धकेलियो। जहाँ बंगलादेशले बाजि मार्यो।
