काठमाडाैं । यस वर्षको अन्तर्दृष्टि पुरस्कार-२०८० तीन विधामा वितरण भएको छ । गोर्खाको अमरज्योति जनता माध्यमिक विद्यालय परिसरमा वसन्तपञ्चमीको अवसरमा अन्तर्दृष्टि पुरस्कार वितरण भएको हो ।
अन्तर्दृष्टि पुरस्कार समितिका संरक्षक डा. कमल लामिछानेका अनुसार अन्तर्दृष्टि नमुना शिक्षक पुरस्कार, अन्तर्दृष्टि हातेमालो पुरस्कार तथा अन्तर्दृष्टि प्रोत्साहन पत्रकारिता पुरस्कार गरी तीन विधामा पुरस्कार वितरण गरिएको हो ।
पत्रकारिताका माध्यमबाट अपाङ्गता भएका व्यक्तिप्रति सकारात्मक सोच र दृष्टिकोणसहित खोज, अन्वेषण एवम् उनीहरूका असीमित सम्भावना र अवसरको पहिचान गरी समावेशी विकास र समतामूलक समाज निर्माणमा योगदान पुर्याउने पत्रकारमध्ये उज्यालो रेडियो नेटवर्कमा कार्यरत पत्रकार अच्युत घिमिरेलाई अन्तर्दृष्टि प्रोत्साहन पत्रकारिता पुरस्कार प्रदान गरिएको छ ।
शिक्षकको शिक्षण सिकाइ क्रियाकलाप र उनीहरूको सामाजिक व्यवहारलाई आधार मानी दृष्टिविहीन विद्यार्थीले छनोट गरेअनुसार यही विद्यालयका शिक्षक किशोर कुमार श्रेष्ठलाई अन्तर्दृष्टि नमुना शिक्षक पुरस्कार प्रदान गरिएको छ । यसैगरी आफूसँग हातेमालो गरेका अपाङ्गता नभएका विद्यार्थीका सहयोगी भूमिका, व्यवहार, सिकाइको आदानप्रदानलाई आधार मानी कक्षा ९ मा अध्ययनरत विद्यार्थी समिर गुरुङलाई अन्तर्दृष्टि हातेमालो पुरस्कार प्रदान गरिएको छ ।
