एजेन्सी । रियाद सिजन कप फुटबल प्रतियोगिताको फाइनलमा निम्त्याइएको विशेष अतिथिलाई देखेर समकालीन विश्व फुटबलका महान खेलाडी क्रिस्टियानो रोनाल्डो पनि दंग परेका छन् । रियाद सिजन कपको फाइनलमा पोर्चुगिज स्टार रोनाल्डो र ब्राजिलियन स्टार नेमारको टोली आमने–सामने थिए ।
साउदी अरेबियाको रियादमा फाइनल खेल सुरु हुनुअघि दुबै टोलीका खेलाडी मैदानमा लामबद्ध थिए । सोही अवसरमा विशेष अतिथिले ट्रफी सार्वजनिक गर्ने कार्यक्रम राखिएको थियो । रंगशालामा उपस्थिति धेरै समर्थक विशेष अतिथिको विषयमा अनभिज्ञ थिए ।
एकाएक फुटबल मैदानमा विशेष अतिथिका रुपमा प्रकट भए, डब्लूडब्लूई सुपर स्टार ‘अन्डरटेकर’ । उनी विस्तारै आफ्नै शैलीमा ढल्कँदै ट्रफी राखिएको स्थानसम्म पुगे । त्यसपछि उनले मैदानमा उपस्थित दर्शकका लागि ट्रफी सार्वजनिक गरे ।
ट्रफी सार्वजनिक गर्न विशेष कार्यक्रम आयोजना गरिएको थियो । ५८ वर्षीय मार्क विलियम कालावे अर्थात अन्डर टेकरले ट्रफी उचालेर रंगशालामा उपस्थित दर्शकलाई पनि देखाए । अन्डरटेकरलाई देखेर रोनाल्डो पनि छक्क परेका थिए । उनी खुसी पनि देखिएका थिए ।
अन्डरटेकरले ट्रफी उचालेपछि रोनाल्डोले हाँसेर आफ्ना साथीसँग कानेखुसी पनि गरेका छन् । उक्त खेलमा रोनाल्डोको टोली पराजित भएको थियो । नेमारको क्लब अल हिलालले रोनाल्डोको क्लब अल नासरलाई २–० गोलले हराएको थियो ।
लामो समयदेखि घाइते अवस्थामा रहेका रोनाल्डो पनि उक्त खेलमा मैदानमा ओर्लिएका थिए । केही दिनअघि मात्र ३९औँ वर्षमा प्रवेश गरेका रोनाल्डोले घाइते भएकै कारण अर्का महान खेलाडी लियोनल मेस्सीको क्लब इन्टर मियामीविरुद्धको मैत्रीपूर्ण खेल पनि गुमाएका थिए । साउदी अरेबियन ब्यवसायीक फुटबलमा अल नासर र अल हिलाललाई चिरप्रतिद्वन्द्वीका रुपमा हेरिन्छ ।
