काठमाडाैं । प्रधानमन्त्री पुष्पकमल दाहाल प्रचण्डले सङ्क्रमणकालीन न्यायलाई टुङ्गोमा पुर्याउन आफूले लगातार पहल गरिरहेको जनाएका छन् ।
७५औँ अन्तर्राष्ट्रिय मानव अधिकार दिवसको अवसर पारेर आइतवार ललितपुरमा आयोजित कार्यक्रममा बोल्दै प्रधानमन्त्री प्रचण्डले पीडितलाई न्यायको अनुभूति हुनेगरी सङ्क्रमणकाललाई निष्कर्षमा पुर्याउन आफूले आमराष्ट्रिय सहमति बनाउनका लागि पहल गरिरहेको जनाएका हुन् ।
सङ्क्रमणकालीन न्याय टुङ्गोमा पुर्याउन ढिलो भइरहेको स्वीकार गर्दै उनले विद्यमान कानुनमा सर्वोच्च अदालतको आदेश, राष्ट्रिय मानव अधिकार आयोगका सुझाव तथा सिफारिस र अन्तर्राष्ट्रिय मापदण्ड बमोजिम परिमार्जन गरी न्यायको अनुभूति हुनेगरी यो कार्यलाई छिट्टै निष्कर्षमा पुर्याउने प्रतिबद्धता पनि दोहोर्याए । प्रधानमन्त्री प्रचण्डले देशमा मानव अधिकार संस्कृतिको विकास गर्न सरकार सदैव लागि परेको समेत जनाए।
