काठमाडौँ / एमाले अध्यक्ष एवं पूर्वप्रधानमन्त्री केपी शर्मा ओलीले मूर्खहरूले मात्रै राजतन्त्र मान्ने टिप्पणी गरेका छन्। राजतन्त्रलाई ‘प्रेत’को संज्ञा दिँदै ओलीले नेपाली जनताले वाक्क, दिक्क भएर फ्याँकेको शक्ति फेरि फर्कन नसक्ने दाबी गरे। शुक्रवार पार्टी मुख्यालय च्यासलमा राष्ट्रिय युवा संघ, नेपालको केन्द्रीय कमिटी बैठकमा उनले कतिपय देशले विभिन्न सम्झौताका कारण राजतन्त्र माने पनि नेपालमा राजनीतिक, वैचारिक, सैद्धान्तिक कुनै हिसावले पनि राजतन्त्र हुनै नसक्ने तर्क गरे।
एउटा मान्छेको छोरो जन्मिँदै राष्ट्रप्रमुख हुन जन्मिने कुरा चेतना नभएका मूर्खहरूले मात्रै गर्ने ओलीको भनाइ थियो।
उनले बिहीवार दुर्गा प्रसार्इंको नेतृत्वको काठमाडौंको बल्खुमा भएको प्रदर्शनप्रति संकेत गर्दै एउटा प्रेतको पछाडि नलिखुट्टाको हड्डी फुकेर राजतन्त्र फर्काउँछु भनेर केही मानिस लागेको बताए।
ओलीले युवा संघ, नेपालको प्रदर्शनलाई भने देशलाई संकटबाट जोगाउनका लागि भएको भन्दै धन्यवाद दिए।
उनले भने, ‘केही तत्व १५ वर्षअघि फ्यालिसकिएका, हेर्दा–हेर्दा वाक्क, ब्याक्क, दिक्क भएर जनताले पाल्न नसकिनेरहेछ यो। र, यो काम लाग्ने चिज नै होइन रहेछ। राजनीतिक रुपले, वैचारिक रुपले, सैद्धान्तिक रुपले, कुनै हिसावले पनि राजतन्त्र, एउटा मान्छेको छोरो जन्मिँदै राष्ट्र प्रमुख हुन जन्मिने। अरुका छोराछोरीले मरिमेटेर काम गरे पनि हुन नपाउने। यस्तो अन्यायपूर्ण विचार बोक्नेहरू। मैले पटक भने–फेरि चित्त दुखाउँछन् मान्छेले। मैले बोल्दाखेरी भनेँ– कित चेतना नै नभएका मूर्खहरूले मात्र राजतन्त्र मान्छन्।’
अध्यक्ष ओलीले बल्खुमा बिहीवार भएको प्रदर्शनमा ५/७ हजार मान्छे रहेको जिकिर गर्दै वर्तमान सरकार भने त्यसबाट थर्कमान भएको बताए। कुनै जग नभएकाले वर्तमान सरकार माग, नारा के हो ? केही पनि थाहा नभएकोहरूको प्रदर्शनबाट पनि थर्कमान भएको उनको भनाइ थियो। अध्यक्ष ओलीले जनतालाई निराश हुन नदिने काम एमालेले गर्नुपर्ने भएकाले त्यस काममा लाग्न पनि युवा संघ, नेपाललाई सचेत गराए।
उनले भने, ‘के हो यो सरकार ? हिजो बल्खुमा भोलि उठी कहाँ जाने ? केही थाहा छैन भन्ने खालका, कहाँ डिँडेका हुन, त्यो पनि थाहा छैन। के का लागि हिँडेका हुन ? त्यो पनि थाहा छैन। के माग हो, के नारा हो ? कहाँ पुग्ने हो, के गर्ने हो ? थाहा छैन। हाहा हुँहुँ हेर्न जान पाइन्छ रे भनेपछि हाहा हुहु हेर्न आए। यो सरकार त्यत्तिकैमा थर्कमान छ।’ अध्यक्ष ओलीले सरकारले जनतालाई निराश बनाउने काम मात्रै गरिरहेको आरोप लगाए।
