बंगलादेशले विश्वकप क्रिकेट २०२३ मा सोमबार श्रीलंकामाथि तीन विकेटको सान्त्वना जित निकालेको छ । तर यो खेल श्रीलंकाली ब्याटर एन्जेलो म्याथ्युजले बेहोरेको ‘टाइम्ड आउट’ का लागि सम्झिनेछ । उनी १ सय ४६ वर्ष लामो अन्तर्राष्ट्रिय क्रिकेटमा यसरी आउट हुने पहिलो ब्याटर रहे ।
स्ट्राइक लिन दुई मिनेट भन्दा बढी समय लगाएपछि विपक्षी कप्तान साकिब अल हसनले अपिल गरेका थिए र त्यसमा अनफिल्ड अम्पायरले आउटको निर्णय थिए । अर्कोतर्फ सेमिफाइनल प्रवेशको समीकरणबाट बाहिरिसकेको बंगलादेशका लागि यो जित च्याम्पियन्स ट्रफिमा छनोटका लागि महत्त्वपूर्ण हुन सक्नेछ ।
यो नतिजापछि बंगलादेशको चार अंक भयो । श्रीलंका पनि चारै अंकमा सीमित रह्यो । हारले श्रीलंकाको सेमिफाइनल प्रवेशको सम्भावना पनि समाप्त भएको छ । जितका लागि २ सय ८० रन पछ्याएको बंगलादेशले ४१.१ ओभरमा सात विकेट गुमाएर २ सय ८२ रन बनायो । उसका लागि नजमुल हुसेनले सर्वाधिक ९० रन बनाए ।
यस्तै साकिबले ८९ रनको योगदान दिए । त्यस अगाडि श्रीलंकाले पहिले ब्याटिङ गर्दै ४९.३ ओभरमा सबै विकेट गुमाउन अगाडि २ सय ७९ रन बनाएको थियो र त्यसमा चरिथा असलन्काले १ सय ८ रन बनाए । यस्तै पथुम निसान्का र सदिरा मरविविक्रमले ४१/४१ रनको योगदान दिए ।
