मोरङ । कोशी प्रदेशमा नेकपा एमालेले सरकारलाई दिएको समर्थन फिर्ता नलिने भएको छ।
सोमबार बिहान एमालेको कोशी प्रदेश संसदीय दलको बैठकले मुख्यमन्त्री केदार कार्की नेतृत्वको सरकारलाई दिएको विश्वासको मत फिर्ता नलिने र सरकारलाई दिएको समर्थन कायम राख्ने निर्णय गरेको हाे।
बैठकपछि संसदीय दलका नेता हिक्मतकुमार कार्कीले सरकारलाई विश्वासको मत दिने र सरकारलाई समर्थन कायम राख्ने निर्णय भएको जानकारी दिए।
दलका नेता तथा पूर्व मुख्यमन्त्री कार्कीले भने, ‘अहिले हामी सरकारलाई दिएको समर्थन फिर्ता नलिने पक्षमा छौं। तर, हामी रचनात्मक रूपमा प्रतिपक्षमा रहनेछौं। मुख्यमन्त्रीज्यूसँग यसअघि पनि केही कुरा भएको छ। त्यसअनुरूप उहाँ अघि बढ्नु हुने अपेक्षा छ।’
हाल प्रतिपक्षको बेन्चमा बस्ने भएपनि आउँदो दिनमा सरकारको भूमिका कस्तो रहन्छ त्यसले नै एमालेको सरकारमा जाने नजाने निर्णय गर्ने उनले बताए।
बैठकले बजेट अध्यादेश स्वीकृत गर्न सहयोग गर्ने, जाजरकोट र रुकुम-पश्चिममा गएको भूकम्पपछि पीडितलाई पारिश्रमिकमा कट्टा हुनेगरी राहत सहयोग गर्ने लगायतका विषयमा छलफल भएको थियाे।
