काठमाडौं / जाजरकोट केन्द्रविन्दु भएर गएको भूकम्पपछि उद्धार तथा राहत कार्यमा जुट्न सुरक्षाका तीनवटै निकायलाई प्रधानमन्त्री पुष्पकमल दाहालले निर्देशन दिएका छन् ।
उनले घाइतेहरुको तत्काल राहत र उद्धारका लागि सबै संयन्त्रहरूको सक्रियताका लागि निर्देशन दिएका छन् ।
घाइतेहरूको उद्धारका लागि शनिबार बिहानै औषधि, स्वास्थ्यकर्मी र हेलिकप्टर पठाउने तयारी सरकारले गरेको छ ।
प्रधानमन्त्रीको आधिकारिक ट्विटमा भनिएको छ, ‘जाजरकोटको रामीडाँडा केन्द्रविन्दु भएर शुक्रबार राति ११ः४७ मा गएको भूकम्पबाट भएको मानवीय तथा भौतिक क्षतिप्रति सम्माननीय प्रधानमन्त्री पुष्पकमल दाहाल “प्रचण्ड”ले गहिरो दुख व्यक्त गर्दै घाइतेहरुको तत्काल उद्धार र राहतका लागि ३ वटै सुरक्षा निकायलाई परिचालित गर्नुभएको छ।‘