काठमाडौं । सन् २०३४ को फिफा विश्वकप आयोजना गर्ने साउदी अरेबियाको प्रस्तावलाई नेपालले समर्थन गर्ने भएको छ ।
एक विज्ञप्तिमार्फत अखिल नेपाल फुटबल संघ (एन्फा)ले आइतबार विश्वकप आयोजनाका लागि साउदीको प्रस्ताबलाई सामर्थन गर्ने बताएको हो ।
पछिल्लो समय साउदीमा अन्तर्राष्ट्रिय खेलकुद कार्यक्रमहरु आयोजना भैरहेको उल्लेख गर्दै एन्फाले साउदीले भौतिक पूर्वाधारमा गरेको लगानी तथा क्षमतावान नेतृत्वका कारण सन् २०३४ को विश्वकप सफलतापूर्वक आयोजना गर्न सक्ने बताएको छ ।
एन्फाले सबै एसियन सदस्य राष्ट्रले एसियाली भुमिका विश्वकप फुटबल फर्काउने अवसरलाई साथ दिने विश्वास समेत राखेको छ ।
सन् २०३४ को विश्वकप आयोजनाका लागि एसियाली देशबाट मात्र प्रस्ताब लिने फिफाको निर्णय गरेको छ । सोही अनुसार एसियाबाट साउदी अरेबियाले प्रतियोगिता आयोजनामा दाबी प्रस्तुत गरेको हो ।
सन् २०२६ को विश्वकप अमेरिका, क्यानडा, मेक्सिको मिलेर आयोजना गर्दैछन् । सन् २०३० को विश्वकप तीन महादेशमा संयुक्त रुपमा आयोजना गर्ने निर्णय भइसकेको छ । त्यसपछि सन् २०३४ को विश्वकप आयोजनामा साउदी अरेबियाले इच्छा देखाएको हो ।
साउदीले विश्वकप आयोजनालाई आफ्नो प्रतिष्ठा र शानसँग जोडेर हेरेको छ । विश्व फुटबलका ठुला स्टारलाई आफ्ना क्लबहरुमा अनुबन्धन गरेर साउदीले विश्व फुटबलको ध्यान खिचिरहेको छ ।
सन् २०२२ को फिफा विश्वकप कतारमा आयोजना भएको थियो ।
