काठमाडौँ / काठमाडौँको तीनकुने सामूहिक हत्याकाण्डका आरोपीलाई प्रहरीले पक्राउ गरी सार्वजनिक गरेको छ। आइतबार साँझ काठमाडौँमा पत्रकार सम्मेलन गरी हत्याकाण्डका आरोपी सिन्धुपाल्चोक बाह्रबिसे नगरपालिकाका सञ्जय भण्डारीलाई प्रहरीले सार्वजनिक गरेको हो।
घटनापछि खुकुरीसहित भागेका उनलाई प्रहरीले सिसिटिभी फुटेजको सहयोगमा पक्राउ गरेको बताएको छ। घटना रिसइबी साँध्नका लागि भएको प्रहरीको भनाइ छ। काठमाडौँ प्रहरी परिसरका प्रहरी वरिष्ठ उपरीक्षक सोमेन्द्र सिंह राठौरले घटना रिसइबीका कारण भएको र बाँकी अध्ययन गर्दै जाने बताए।
केही दिनअघि मृतक विशाल राईले चलाएको मोटरसाइकलका विषयमा भण्डारीलाई कुटपिट गरेको र सोही रिसइबी साँध्नका लागि बारम्बार प्रयास गरेको र त्यही क्रममा हत्या गरेको अनुसन्धानबाट खुलेको उनले बताए।
उनले भने, ‘केही समयअघि मृतक विशाल राईले चलाएको मोटरसाइकलको विषयमा विवाद हुन गई मृतक विशाल राईले प्रतिवादी सञ्जय भण्डारीलाई कुटपिट गरेकोमा त्यही रिसिइबी साँध्नका लागि बारम्बार कुरा गर्ने प्रयास गरेको र भेट नभएको, समिलमा छ भन्ने थाहा पाएर घरभित्र जाँदा घटना भएको देखिन्छ। निज व्यक्ति बोल्न नसक्ने हुनुहुन्छ।’
पक्राउ परेका भण्डारी बोल्न नसक्ने भएकाले प्रहरीले लेख्न लगाएको थियो। लेखेर उनले घटनाको स्वीकार गरेका थिए। उनले दिदीभिनाजुको घरबाट विशाल राईलाई भेटे छप्काइदिन्छु भन्दै खुकुरी बोकेर ल्याएको एसएसपी राठोरले बताए।
भण्डारीले समिलको पछाडिको ढोकाबाट प्रवेश गरी हत्या गरेको प्रहरीको भनाइ छ। राईलाई हत्या गरिसकेपछि अन्य तीनजनाले पनि देख्ने डरले हत्या गरेको भण्डारीले स्वीकार गरेको प्रहरीको प्रारम्भिक अनुसन्धानले खुलेको राठोरले बताए।
