काठमाडौँ / करोडौं घाटा व्यहोरेपछि नेपाल वायुसेवा निगमले साउदी अरबको राजधानी रियाद उडान बन्द गरेको छ । तामझामका साथ २०७९ वैशाख ९ गतेदेखि निगमले साउदीको राजधानीमा श्रमबजारलाई लक्षित गर्दै काठमाडौं–रियाद सिधा उडान थालेको थियो ।
निगमका प्रवक्ता रमेश पौडेलका अनुसार, सातामा दुइटा उडान हुँदै आएको रियादमा आम्दानी गर्न नसकेपछि साउदीको पश्चिमी सहर दमाममा बुधबारदेखि उडान सुरु गरिएको छ । ‘रियादमा त्यहाँको सिभिल एभिएसनबाट उडान समयका एकरुपता प्राप्त भएन । कहिले कुन बार, कहिले कुन समयले गर्दा उडानमा स्थिरता हुन नसक्दा निगमले नोक्सानी ब्यहोर्नु पर्यो । र, हामीले अब दमाम उडान गर्ने निर्णय लियौं । त्यहाँबाट उडान समयमा स्थिरता हुने आश्वासन प्राप्त भएको छ ।’
प्रवक्ता पौडेलले अहिले सातामा दुई दिन बुधबार र शनिबार काठमाडौंबाट सिधा उडान गर्ने यात्रुको माग बढ्दै गएपछि उडान संख्या थप्ने बताए । निगमले बुधबार राति दमामका लागि पठाएको पहिलो उडानबाट १ सय २६ यात्रु गएका थिए । १ सय ५८ सिट क्षमताको एयरबस ए–३२० ले दमामबाट नेपाल १ सय १७ जना यात्रु ल्याएर फर्केको थियो ।
सातामा दुई दिनमात्रै उडान हुने भएकाले निगमले अहिले चालक तथा क्याबिन क्रूसहित १० जना हाराहारीको बेग्लै सेट काठमाडौंबाट त्यही उडानमा पठाउने गरेको छ । निगमका एक पाइलटका अनुसार, एक सेटले जहाज लैजाने र अर्को सेटलाई ल्याउने जिम्मेवारी दिइएको छ ।
दमाममा निगमअघि चिनियाँ र नेपालीको संयुक्त लगानीमा स्थापना भएको हिमालय एयरलायन्सले ०७४ देखि दमाममा उडान गर्दै आइरहेको छ । दमाममा ठूलो संख्यामा नेपाली कामदार छन् । अब निगमले हिमालय एयरलायन्ससँग प्रतिस्पर्धा गर्नुपर्ने छ ।
निगमले बजार अध्ययन नगरी एजेन्टसँग कमिसन असुल्ने उद्देश्यले उडान थाल्दा यसअघि वाइडबडी विमानबाट जापानको ओसाकाको उडान पनि बन्द गरेको थियो । निगमका कार्यकारी अध्यक्ष युवराज अधिकारीले नेपाली सांसदसहित २१ जनाको भ्रमण टोली लिई सुरुआत गरेको रियाद उडान घाटामा गएसँगै यो गन्तव्य पनि ओसाका जस्तै कमिसन र बिना अध्ययनको विवादमुक्त हुन सकेन ।
