काठमाडाैं । असारको २१ गते आफ्नै निवासमा आत्महत्या गरेका नायक सारुक ताम्रकारको संझनामा काठमाडौंको बौद्ध स्तुपामा दीप प्रज्ज्वलन गरिएको छ ।
सारुकको तस्वीरको अगाडि दीप प्रज्ज्वलन गर्दै गर्दा उनका नजिकका साथीभाई, आफन्त र परिवारका सदस्यहरू भक्कानिए । दीप प्रज्ज्वलन गर्न नेपाली फिल्मका कलाकारहरू समेत पुगेका थिए । नायिका साम्राज्ञी राज्यलक्ष्मी शाह, वर्षा सिवाकोटी, मलिना जोशी, सुष्मा कार्की, श्रद्धा क्षेत्री, निर्देशक रेनशा वान्तवा राई, निर्माता प्रज्ज्वल शमशेर जबरा लगायतले सारुकलाई संझदै दीप बाले । यस्तै, गायक नितेश जंग कुँवरदेखि भ्लगर सिसन बाँनिया, पूर्व मिस नेपाल अश्मी श्रेष्ठले पनि सारुकको संझनामा दीप प्रज्ज्वलन गरे ।
दीप प्रज्ज्वलनमा सारुकका माता पिता समेत उपस्थित थिए । छोराको तस्विर अगाडि दीप प्रज्ज्वलन गर्दै गर्दा पिता सानु ताम्रकारका आँखा रसाएका थिए ।
दीप प्रज्ज्वलन कार्यक्रममा गायक नितेश जंग कुँवर, भ्लगर सिसन बानियाँ लगायतले सारुकको व्यक्तित्वको चर्चा गरेका थिए । उनीहरूले सारुक राम्रो मान्छे भएरै छोटो समयका लागि यो संसारमा आएको रहेछ भन्दा सबैको आँखा रसाएका थिए ।
फिल्म ‘ह्यासट्याग माया’को छायांकन सकेर घरमा आएका सारुकले असार २१ गते आत्महत्या गरेका थिए । उनको आत्महत्याको कारण पत्ता लगाउन प्रहरीले सोधपुछ पनि जारी राखिरहेको छ ।
