काठमाडौं । राष्ट्रिय चिकित्सा विज्ञान प्रतिष्ठान (न्याम्स) वीर अस्पतालमा ओपीडी सेवा अबदेखि ८ बजेबाट सञ्चालन हुने भएको छ । शुक्रबार न्याम्सको परिषद् बैठकले १ साउनदेखि ओपीडी सेवा बिहान ८ बजेदेखि गर्ने निर्णय गरेको हो ।
अर्थात, अबदेखि अस्पतालको समय बिहान ८ देखि ४ बजेसम्म कायम गरिएको छ । हाल, बिहान ९ देखि ५ बजेसम्म कार्यालय सेवा हुँदै आइरहेको छ । न्याम्सका उपकुलपति प्रा.डा भुपेन्द्र बस्नेतले बिरामी बिहान चाँडै आउने र बढी भीडभाड हुने भएकाले ओपीडीलगायतका अन्य सेवा सहज बनाउन समय तालिका छिट्टै बनाइएको बताए ।
‘बिरामी सेवा लिनको ७ बजे नै अस्पताल आइसक्छन् । ९ बजेसम्म कुर्नुपर्ने भएकाले बढी भिडभाड भइरहेको छ,’ डा. बस्नेतले अनलाइनखबरसँग भने, ‘बिरामीलाई सहज र छिट्टै सेवा दिनका लागि ओपीडीलगायत अस्पतालका अन्य सेवाअबदेखि ८ बजेबाट सञ्चालन हुनेछन् ।’ अस्पतालमा ९ बजेदेखि सेवा हुँदा अस्पतालका कर्मचारी र बिरामी आउने क्रममा सवारी जाममा पर्ने समस्या देखिएकाले समय तालिका परिवर्तन गरी सेवालाई सहज बनाउन खोजिएको उनको भनाइ छ ।
आर्थिक वर्ष २०८०/०८१ को नीति तथा कार्यक्रममा सबै सरकारी अस्पतालमा बिहान ८ देखि बेलुका ८ सम्म ओपीडी सेव सञ्चालन गर्ने उल्लेख गरिएको थियो । तर, यो विषयलाई बजेटले भने समेट्न सकेको थिएन । ‘अबदेखि प्रयोशाला, ओपीडी टिकट काउन्टर विहान ७ बजेनै खुलिसक्छन् । नर्सिङ सिफ्ट पनि ८ बजे परिवर्तन हुन्छ,’ डा. बस्नेतले भने, ‘अप्रेशन, ओपीडी सेवा, लगायतका अन्य सेवा विहान ८ देखि ४ बजेसम्म सञ्चालन हुनेछन् ।’ वीरमा बिरामीको चाप बिहान ८ देखि १२ बजेसम्म बढी चाप हुन्छ । त्यसैगरी, ४ बजेपछिको समय इएचएस सेवा सञ्चालन कसरी प्रभावकारी बनाउने भन्ने बिषयमा छलफल भइरहेको उनले बताए । वीरमा दैनिक २ हजार पाँच सयभन्दा बढी बिरामीले ओपीडी सेवा लिने गरेका छन् ।
