काठमाडौँ- नेपाली कांग्रेसका महामन्त्री गगनकुमार थापाले आफू वा आफ्नो पुस्ताको व्यक्ति प्रधानमन्त्री बन्नु देशको अहिलेको आवश्यकता भएको बताएका छन्।
शनिबा काठमाडौँमा भएको एक कार्यक्रमलाई सम्बोधन गर्दै उनले यस्तो बताएका हुन्।
उनले आफू पुनः कांग्रेसको संसदीय दलको नेता बदल्ने कुरामा लाग्ने र बदल्न सके आफू र आफ्नो पुस्ताको व्यक्तिलाई प्रधानमन्त्री बनाउने बताए।
उनले नेपालमा अर्को प्रधानमन्त्री को बन्दैछ भन्नेकुरा सबै नेपालीहरुलाई पहिला नै थाहा हुने भइसकेको भन्दै अब पूर्वप्रधानमन्त्री पुनः प्रधानमन्त्री बन्नेकुरा रोक्न सक्नुपर्नेमा जाेड दिए।
महामन्त्री थापाले भने, ‘नेपालमा यपछि अर्को प्रधानमन्त्री को बन्दैछ भन्नेकुरा एउटा मानिसले सहजै पत्ता लगाउन सक्छ। नेपालका राजनीतिक पार्टीहरू यस्ता भए। नेकपा एमालेले कसरी बदल्छ त्यो उहाँहरूको कुरा हो, नेकपा माओवादी केन्द्रले कसरी बदल्छ त्यो पनि उहाँहरूको कुरा हो। हामी कांग्रेसमा छाैँ, त्यसैले यसलाई बदल्ने प्रयास गर्नैपर्छ। त्यही कुरा गर्ने कोसिस गरेको हो । म त क्लियर छु, विधिभित्रै रहेर यो कुरा गरिरहेको छु । मैले सबै साथीहरूको चित्त त बुझाउन सकिनँ। तर म थाकेको छैन, हारेको छैन, नेपाली कांग्रेसबाट भुतपूर्व भएको प्रधानमन्त्री कांग्रेसले पछि प्रधानमन्त्री बनाउन पाएको बेलामा बनाउनु हुँदैन। अहिलेको आवश्यकता म वा मेरो पुस्ताको मान्छे प्रधानमन्त्री बन्ने कुराको छ।’
उनले कांग्रेसले मिसन २०८४ नभइ २०८० र २०८१ को सुरु गर्न जरुरी रहेको पनि बताए।
