काठमाडौँ – द्विराष्ट्रिय चेम्बर अफ कमर्सको टोलीले व्यापार सहजीकरण गर्न नेपाल सरकारका मुख्यसचिव वैकुण्ठ अर्याललाई आग्रह गरेको छ।
बुधवार अपराह्न सिंहदरबारमा द्विराष्ट्रिय चेम्बर अफ कमर्सको टोलीले मुख्यसचिव अर्यालसँग भेटेर डुइङ बिजनेस कस्ट घटाउन पहल गरिदिन आग्रह गरेको हो। आर्थिक मन्दीको चपेटामा परेको व्यवसायलाई सहयोग पुग्नेगरी डुइङ बिजनेस कस्ट घटाउँदा सहजीकरण हुने भन्दै व्यवसायीहरूले आग्रह गरे।
भेटपछि बोल्दै नेपाल—अस्ट्रेलिया चेम्बर अफ कमर्सका अध्यक्ष।अखिल चापागाईंले द्विराष्ट्रिय चेम्बर अफ कमर्स नेपालको आर्थिक कूटनीतिको बलियो आधार भएपनि प्राथमिकतामा नपरेको बताए। मुख्यसचिवसँगको भेटमा आर्थिक कूटनीतिको विषयमा द्विराष्ट्रिय चेम्बर अफ कमर्सले धेरै सहयोग गर्नसक्ने कुरा जानकारी दिएको पनि अध्यक्ष चापागाईंले बताए।
अध्यक्ष चापागाईंले द्विराष्ट्रिय चेम्बर अफ कमर्सका प्रतिनिधिहरूले नेपाल राष्ट्र बैंकले ल्याउन लागेको मौद्रिक नीतिले व्यवसायीहरूको गुनासो सम्बोधन गर्नेगरी ल्याउने वातावरण मिलाइदिन आग्रह गरेको बताए।
नेपालका २० भन्दा बढी द्विराष्ट्रिय चेम्बर अफ कमर्स क्रियाशील छन्। नेपाल र गन्तव्य मुलुकका व्यवसायीबीच व्यापार व्यवसाय सहजीकरण हुने र संगृहित हुने उद्देश्यले द्विराष्ट्रिय चेम्बर अफ कमर्सको गठन हुने गरेको छ।
