काठमाडौं / आगामी अक्टोबर र नोभेम्बरमा भारतमा हुने एकदिवसीय विश्वकपमा वेस्टइन्डिज पछि जिम्बाब्वे प्रतियोगितामा छनोट हुन असफल भएको छ। मंगलबार भएको खेलमा स्कटल्यान्डसँग जित्नै पर्ने दबाबमा रहेको खेलमा पराजित हुन पुगेपछि घरेलु टोली स्तब्ध बनेको हो।
पछिल्ला दुई खेलमा लगातार पराजित भएसँगै विश्वकप छनोटबाटै घरेलु टोली जिम्बाब्वे बाहिरिएको हो। अघिल्लो खेलमा श्रीलंकासँग पराजत जिम्बाब्वे मंगलबार जित्नै पर्ने खेलमा स्कटल्यान्डसँग ३१ रनले पराजित भएको हो।
टस हारेर पहिले ब्याटिङ गर्दै स्कटल्यान्डले दिएको २३५ रनको लक्ष्य पछ्याएको जिम्बाब्वे ४१.१ ओभरमा अलआउट हुँदै २०३ रनमा समेटियो। रायन बर्लले ८३ रनको इनिङ खेलेपनि टिमको विश्वकप सपना पुरा गर्न भने असफल रहे। पछिल्लो क्रम नाटकिय विकेटपतनको सिकार हुँदा जिम्बाब्वे पराजित भयो।
जिम्बावे ५ खेलमा ३ मा जित र २ मा हारका साथ ६ अंकका साथ तेस्रो स्थानमा छ। जिम्बाब्वेको नेटनरेट माइनस ०.०९९ छ। उता स्कटल्यान्ड ४ खेलमा ३ मा जित र १ मा हारसहित ६ अंकका साथ दोस्रो स्थानमा छ। नेदरल्यान्ड्स ४ खेलमा २ मा जित र २ मा हारसहित ४ अंकका साथ चौथो स्थानमा छ। श्रीलंका प्रतियोगितामा छनोट भइसकेको छ।
नेदरल्यान्ड्सको नेटरनरेट माइनस ०.०४२ र स्कटल्यान्डको ०.२६९ छ। बिहीबार नेदरल्यान्ड् र स्कटल्यान्डबीच प्रतिस्पर्धा हुने छ। उक्त खेलमा स्कटल्यान्ड विजयी हुँदा सोझै विश्वकपमा पुग्ने छ। यदि स्कटल्यान्ड पराजित भएमा नेटनरेटमा माथि रहने नेदरल्यान्ड्स र स्कटल्यान्ड मध्य एक टोली विश्वकपमा पुग्ने छन्।
