काठमाडौँ / नेकपा एमालेका सचिव योगेश भट्टराईले एमाले र एमालेको नेतृत्वलाई हमला गरेर कोशी प्रदेशको समस्या समाधान नहुने बताएका छन् । पहिचान पक्षधरहरूले इलाममा आयोजित कार्यक्रममा सहभागी हुन गइरहेको बेला सचिव भट्टराईलाई कालो झण्डा देखाएपछि सचिव उनले यस्तो प्रतिक्रिया दिएका हुन् ।
‘उत्तेजनात्मक, निषेधकारी र हिंसात्मक तरिका हामिलाई मान्य छैन । एमाले र एमालेको नेतृत्वलाई हमला गरेर कोशी प्रदेशको समस्या हल हुँदैन,’ उनले लेखेका छन्, ‘एमाले वार्ता र संवादका लागि हरबखत तयार छ ।’ मदन भण्डारी फाउन्डेसनले इलाममा बिहीबार आयोजना गरेको कार्यक्रममा सहभागी हुने क्रममा इलाम बजारमा पहिचान पक्षधरहरूले एमाले सचिव भट्टराईविरुद्ध कालो झण्डा देखाउँदै विरोध गरेका थिए ।
प्रदेशसभाले प्रदेशको नाम कोशी राख्ने भएपछि पहिचान पक्षधरहरू आक्रोशित हुँदै आएका छन् । यसअघि पनि पहिचान पक्षधरहरूले एमाले अध्यक्ष केपी शर्मा ओली पूर्वी पहाडी जिल्लाको भ्रमणमा जाँदा विरोध प्रदर्शन गर्दै आएका थिए ।
‘एमाले फरक विचार र मतलाई सम्मान गर्ने पार्टी हो । आज मलाई कालो झण्डा देखाउनेहरूको अधिकारका लागि म स्वयं र मजस्ता लाखौंले लडेर ल्याएको विरोध गर्ने अधिकारको अभ्यास उहाँहरूले गर्नुभएकोमा लोकतन्त्रको संघर्षमा हामीले बिताएको समयले सार्थकता पाएको अनुभूति भएको छ,’ उनले भने, ‘हाम्रो भनाइ यही छ कि विरोध शान्तिपूर्ण मान्यताभित्र हुनुपर्छ ।’
