सुनसरी । जिल्ला प्रशासन कार्यालय सुनसरीमा पछिल्लो समय बिहान ४ बजेदेखि नै नागरिकता लिनेहरूको भीड लाग्न थालेको छ । जन्मका आधारमा नागरिकता लिएकाहरूका सन्तानलाई वंशजको आधारमा नागरिकता वितरण सुरु गरेपछि प्रशासन कार्यालयमा सेवाग्राहीको भीड बढेको हो । अन्य जिल्लामा जस्तै सुनसरीमा पनि मंगलबारदेखि जन्मका आधारमा नागरिकता लिएकाहरूका सन्ततीहरूले वंशजको आधारमा नागरिकता प्राप्त गर्न थालेका छन् ।
मंगलबार पहिलो दिन ४७ जनाले वंशजको आधारमा नागरिकता लिए पनि बुधबार बिहानैबाट भीड बढेको प्रमुख जिल्ला अधिकारी हुमकला पाण्डेले बताइन् ।
पाण्डेका अनुसार मंगलबार २९ महिला र १८ पुरुषलाई नेपाल नागरिकता ऐन, २०६३ लाई संशोधन गर्न बनेको नेपाल नागरिकता (पहिलो संशोधन) ऐन, २०७९ बमोजिम नागरिकता वितरण गरिएको हो ।
सेवाग्राहीको भीड अत्यधिक बढेपछि जिल्ला प्रशासन कार्यालयले बुधबारका लागि एक सय ६० जनाका लागि टोकन दिएको छ । भीड बढेपछि कार्यलयले बिहीबारदेखि स्थानीय तहअनुसार तालिका बनाएर दैनिक सेवा दिने जनाएको छ । बिहीबारबाट नागरिकता प्राप्त गर्न पालिका विभाजन तालिका अनुसार आउन अनुरोध गरेको छ ।
आइतबार इटहरी उपमहानगरपालिका, सोमबार रामधुनी नगरपालिका र भोक्राहा गाउँपालिका, मंगलबार बराहक्षेत्र नगरपालिका, बुधबार दुहबी नगरपालिका, बिहीबार इनरुवा नगरपालिका र गढी गाउँपालिका साथै शुक्रबार कोशी गाउँपालिकाका सेवाग्राहीले नागरिकता लिन जानुपर्ने तालिका बनाएको प्रशासनले जनाएको छ ।
राष्ट्रपति रामचन्द्र पौडेलले प्रमाणीकरण गरेको नागरिकता विधेयक कार्यान्वयन गर्न सर्वोच्च अदालतले आदेश दिएसँगै जन्मका आधारमा नेपाली नागरिकता लिएकाहरूका सन्तानले वंशजका आधारमा नागरिकता पाउन थालेका हुन् ।
विधेयक प्रमाणीकरण नहुँदा ठूलो संख्यामा विशेषगरी मधेशका बासिन्दाहरू नागरिकता विहीन बन्नु परेको थियो ।
