काठमाडौं । नेवार समुदायले आज सिथि नखः पर्व मनाइरहेका छन् । आजका दिन चतामरी, मास, सानो केराउ, मुगि लगायत गेडागुडिबाट बनाइने विशेष प्रकारको ६ किसिमका रोटीसहित ६ किसिमकै तरकारी चढाएर कार्तिकेय कुमार र भूमिको विशेष पूजा गरिन्छ ।
सिथि नख हरेक वर्षको जेष्ठ शुक्ल षष्ठीका दिन मनाइने गरिन्छ । त्यस्तै आजका दिन नेवार समुदायले देवाली पूजाको पनि समापन गर्ने गर्दछन् । आज नै काठमाडौंको जोशीदेगलमा रहेको ६ वटा टाउको भएको कार्तिकेय कुमारलाई पनि विशेष पुजा गरिन्छ । ४० वर्षजति अगाडि आजका दिन कार्तिकेय कुमारलाई बेलुकामा नगर परिक्रमा गरेर जात्रा गरिन्थ्यो तर अहिले यो जात्रा विभिन्न कारणले रोकिएको
छ ।
यस्तै भक्तपूरको चासखेलमा चण्डेश्वरी देवी र थिमिका लोकेश्वरको पनि आज जात्रा हुन्छ ।
सिथि नखःका दिन हरेक वर्ष पानीको श्रोतलाई पुन सरसफाई गर्नु पर्दछ र आफू बसेको वातावरणलाई सरसफाई गरेमा सभ्यताको विकास हुन्छ भन्ने मान्यताका साथ पानीको श्रोत इनार, कुवाको पनि सरसफाई गरिन्छ । इनारको विशेष पूजा गरी इनार भित्र गएर सफा गरिन्छ । सफा गरिसकेपछि चार दिनसम्म इनारबाट पानी तानिदैन, छोपेर राखिन्छ । चार दिनमा फेरि पूजा गरेर मात्र पानी लिने चलन छ । अझै पनि नेवार समुदायमा इनार सफा गर्नको लागि आजकै दिन पर्खिने परम्परा छ ।
अहिलेको मौसममा पानीको सतह कम हुने भएकोले सफा गर्न सहज हुने भएकोले अग्रजहरुले यो दिनलाई उपयुक्त मानेको हुन सक्ने अनुमान स्थानीय समुदाय गर्ने गर्दछ । यस पर्वसँगै १५ दिन बिराएर आउने चाडपर्वको क्रम समापन हुन्छ भने गठेमङ्गलबाट यो क्रम सुरु हुन्छ ।
