काठमाडौँ — एक वर्षभन्दा लामो समयदेखि रुस–युक्रेन युद्ध चलिरहेकै बेलामा नेपालबाट वैशाख ६–१२ सम्म एक उच्चस्तरीय भ्रमण सम्पन्न भएको छ । राष्ट्रिय सभाका अध्यक्ष गणेशप्रसाद तिमिल्सिनाको नेतृत्वमा एक संसदीय टोलीले रुसका दुई ठूला शहर मस्को र सेन्ट पिटरसवर्गको भ्रमण गरेको हो । उक्त अवशरमा नेपालको राष्ट्रिय सभा र रुसको माथिल्लो सदन फेडेरेसन काउन्सिल बीच ‘अन्तर संसदीय सहयोग सम्झौता’ भयो ।
उक्त सम्झौता पत्रमा राष्ट्रिय सभाका अध्यक्ष तिमिल्सिना र रुसको माथिल्लो सदन फेडेरेसन काउन्सिलकी अध्यक्ष भालेन्टिना भाट्भिइन्को बीच हस्ताक्षर भएको थियो । परराष्ट्र मन्त्रालयलाई जानकारी दिइएर उक्त सहमति भएको र त्यसमा मन्त्रीपरिषद्को निर्णय आवश्यक नपर्ने अध्यक्ष तिमिल्सिनाले जानकारी दिए । उनले भ्रमणको समिक्षा गर्दै अत्यन्तै सफल भएको अनुभूति गरेको उल्लेख गरे । ‘दुई माथिल्लो सदन बीचमा साझेदारी पत्रमा हस्ताक्षर गर्छौं । त्यो सरकारललाई जानकारी दिएर परराष्ट्र मन्त्रालयसँग सल्लाह गरेर गरेका हौं,’ उनले भने,‘हाम्रो दुई संसद बीचको सहकार्य गर्ने, संसद बीचको अनुभव आदान–प्रदान गर्ने, संसदीय मैत्री समूहहरु गठन गर्ने । भ्रमणहरु आदान प्रदान गर्ने तथा ज्ञान र प्रविधि साटा साटा गर्ने गरि साझेदारी भएको हो ।’
भ्रमणकै बेला अध्यक्ष तिमिल्सिनाले रुसी उपप्रधानमन्त्री दिमित्री चेर्निसेन्कोसँग पनि भेटवार्ता गरे । त्यस अवशरमा रुसले नेपाललाई रासायनिक मल र गहुँ उपलब्ध गराउन सकारात्मक देखिएको अध्यक्ष तिमिल्सिनाले जानकारी दिए । ‘रुसी उपप्रधानमन्त्री ज्यूले नेपाल सरकारले चाहेको अवस्थामा जिटुजीमार्फत मल र गहुँ उपलब्ध गराउन तयार रहेको बताउनु भयो । त्यसका लागि नेपालले मन्त्री परिषद्बाट निर्णय गरेर प्रक्रिया अगाडि बढाउन उहाँको आग्रह थियो,’ अध्यक्ष तिमिल्सिनाले भने ।
उक्त भेटवार्तामा नेपाल र रुसबीचको सिधा हवाईसेवा सुरु गर्ने, रुसमा नेपाली विद्यार्थीको शिक्षाको लागि कोटा बढाउने, सबवे, रेलमार्ग, मोटरवे र जलविद्युत् आयोजना निर्माणमा पूर्वाधार निर्माणमा सहयोग गर्ने विषयमा पनि छलफल भएको अध्यक्षले जानकारी दिए । उनले भने,‘के के विषयमा कुराकानी र छलफल गर्ने भन्ने बारेमा भ्रमण अघि नै मैले सम्माननीय प्रधानमन्त्री ज्यूसँग कुराकानी गरेर गएको थिएँ । त्यसले गर्दा दुई मुलुक बीचको कुराकानीलाई अगाडि बढाउन सहज पनि भयो ।’
अध्यक्ष तिमिल्सिनाको भ्रमणलाई रुसी सञ्चारमाध्यमहरुले प्राथमिकता दिएका थिए । ‘तपाईं (अध्यक्ष तिमिल्सिना) को भ्रमण एउटा उल्लेखनीय कार्यक्रम बन्ने र रुस–नेपालबीचको अन्तरक्रियालाई प्रोत्साहन दिने मलाई विश्वास छ । नेपाल दक्षिण एसियामा रुसको लामो समयदेखिको साझेदार हो, हाम्रा जनताबीच मित्रताको बलियो सम्बन्ध छ । रुस र नेपालबीचको सम्बन्ध सुमधुर छ । सधैं समानता र आपसी सम्मानको आधारमा निर्माण गरिएको छ,’ चेर्निसेन्कोको उपप्रधानमन्त्री कार्यालयलाई उदृत गर्दै समाचार संस्था तासले उल्लेख गरेको छ ।
रुस र युक्रेन बीच युद्ध चलेपछि नेपालबाट उच्च तहमा भएको यो दोस्रो ठूलो भ्रमण हो । यस अघि २०७९ मा एक मन्त्रीले रुसको भ्रमण गरेका थिए ।
बक्सिङ फेडरेसन अफ रसिया र रुसका खेलकुद मन्त्रीको निमन्त्रणामा तत्कालिन युवा तथा खेलकुद मन्त्री महेश्वरजंग गहतराजको नेतृत्वमा ८ सदस्यीय टोलीले २०७९ को जेठ ३० देखि असार ३ सम्म भ्रमण भएको थियो । रुसले युक्रेनमाथि हमला गरेपछि संयुक्त राष्ट्र संघमा नेपालले रुसको आक्रमणको विरुद्धमा मतदान गर्दै आइरहेको छ ।
