आत्महत्याबारे भारतीय प्रधानमन्त्री नरेन्द्र मोदीले गरेको ‘जोक’प्रति सामाजिक सञ्जालमा विपक्षी नेताहरुले मात्र होइन, सञ्चारकर्मी र अन्य सरोकारवालाले पनि आक्रोश व्यक्त गरेका छन्।
पत्रकारहरुको एक जमघटमा भारतीय प्रधानमन्त्री मोदीले बुधबार आत्महत्यालाई जोकको विषय बनाएका थिए।
उनले भनेका थिए-
मेरो बाल्यकालमा म एउटा जोक सुन्ने गर्थेँ जुन तपाईँहरुलाई भन्दै छु।
एकजना प्राध्यापककी छोरीले आत्महत्या गरिछिन्।
उनले एउटा चिर्कटोमा लेखिछन्– म जीवनदेखि थाकेँ र अब बाँच्न चाहन्न। म कन्करिया तालबाट फाल हान्छ् र मर्छु।
बिहान प्राध्यापकले छोरीलाई घरमा भेटेनन्। उनको ओच्छ्यानमा चिर्कटो भेटियो। प्राध्यापक एकदमै रिसाएछन्। छोरीले ‘कन्करिया‘को स्पेलिङ नै गल्ती लेखिछन्। प्राध्यापकले भने– कत्ति वर्षदेखि म मेहनत गरिरहेको छु। अहिले चाहिँ मेरी छोरीले ‘कन्करिया‘को स्पेलिङ नै गल्ती लेखिछन्।
मोदीको जोकमा स्रोताहरुले ताली पड्काए। मोदी आफैँ पनि हाँसे।
त्यसपछि मोदीले भने- म धेरै खुसी छु। अर्नब (रिपब्लिक टिभीका प्रमुख अर्नब गोश्वामी) ले राम्रो हिन्दी बोल्न थालेका छन्।
दर्शकदिर्घाबाट ताली झन् बर्सियो।
मोदीले थपे- उसले के भन्यो भन्ने मैले सुनिनँ तर उसको हिन्दी सही छ कि छैन भन्नेमा मैले ध्यान दिइरहेको थिएँ। सायद मुम्बई बस्न थालेकाले तिमीले राम्रो हिन्दी सिक्यौ।
अर्नबको हिन्दीको प्रशंसा गर्न आत्महत्याको यति भत्ता मजाक किन जरुरी थियो ?
भारतमा आत्महत्याको अवस्था निकै विकराल छ। सन् २०२१ मा १ लाख ६४ हजार ३३ जनाले आत्महत्या गरेको तथ्यांक छ। दैनिक ४५० व्यक्तिको यो तथ्यांक अघिल्लो वर्षभन्दा ७.२ प्रतिशत बढी हो।
आत्महत्यामाथि मोदीको भद्दा मजाकको सर्वत्र विरोध भइरहेको छ।
कांग्रेस नेता राहुल गान्धीले मोदीको आलोचना गर्दै हजारौँ बुबाआमाले आत्महत्याबाट सन्तान गुमाउँदा प्रधानमन्त्रीले भने त्यो विषयलाई जोक बनाएको भन्दै आपत्ति प्रकट गरेका छन्। कांग्रेस नेत्री प्रियंका गान्धीले पनि भारतको आत्महत्या दर दुखको विषय भएको उल्लेख गर्दै यो मजाकको विषय हुननसक्ने बताएकी छन्।
प्रधानमन्त्री र उनको आत्महत्याको जोकमा हाँस्नेहरु असंवेदनशील भएको पनि प्रियंकाले लेखेकी छन्।
राष्ट्रिय जनता दलका सांसद मनोजकुमार झाले प्रधानमन्त्री आत्महत्याजस्तो गम्भीर विषयलाई जोकमा उडाउँछन् र त्यो जोकमाथि थपडी बज्छ भन्दै दुख प्रकट गरेका छन्। उनले भारतीय समाज रोगी हुँदै गरेको टिप्पणी गरेका छन्। शिव सेनाकी सांसद प्रियंका चतुर्वेदीले पनि मोदीको जोक असंवेदनशील भएको टिप्पणी गरेकी छन्।
(भारतीय सञ्चारमाध्यमबाट साभार)
