गुल्मी । नेपाल कम्युनिस्ट पार्टी गुल्मीले दुईजना ज्येष्ठ कम्युनिस्ट सदस्यलाई सम्मान गरेको छ । नेकपाको ७५ औं स्थापना दिवस अन्तर्गत सप्ताहव्यापी कार्यक्रम तालिका अनुसार सम्मान गरेको हो ।
सम्मानित हुनेमा मदानेस्थित ९१ बर्षीय ज्येष्ठ कम्युनिस्ट सदस्य एवं पार्टीका जिल्ला सल्लाहकार कर्णबहादुर केसी र सत्यवती गाउँपालिका अस्लेवाचौर निवासी ६५ बर्षीय पुरुषोत्तम अधिकारी रहेका छन् ।
अधिकारी निवासमा आयोजित कार्यक्रममा बोल्दै नेकपा जिल्ला इन्चार्ज सुमन सीले पञ्चायत विरोधी आन्दोलन, महान जनयुद्ध हुँदै एकीकृत जनक्रान्तिसम्म कम्युनिस्ट आन्दोलनलाई अगाडी बढाउन योगदान गर्ने, नयाँ पुस्तालाई क्रान्तिमा जोड्न प्रेरित गर्ने र सम्पूर्ण जीवन पार्टी र क्रान्तिमा समर्पित गर्ने अग्रजहरु कम्युनिस्ट आन्दोलनको पुँजी भएको बताएका छन् । उनले कम्युनिस्ट आन्दोलनमा समर्पित अग्रजहरुको पार्टीले सम्मान र संरक्षण गर्ने बताए ।
मदानेस्थित कार्यक्रममा नेकपा सचिवालय सदस्य भीषण सीले कम्युनिस्ट आन्दोलनमा महत्वपूर्ण योगदान गर्ने अग्रजहरुलाई पार्टीले सदैव सम्मान गर्ने बताए । सचिवालय सदस्य प्रकाश सी र अर्जुन सीले कम्युनिस्ट आन्दोलनमा जीवन विताएका अग्रजहरुलाई सम्मान गरेर पार्टीले नयाँ संस्कृतिको थालनी गरेको बताए ।
पार्टीको केन्द्रीय कार्यक्रम र जिल्ला पार्टीको निर्णय अनुसार केसी र अधिकारीलाई नेकपाले सम्मान गरेको हो । उहाँहरुलाई सम्मान पत्र, खादा, दोर्सल्ला र नगदले सम्मान गरिएको नेकपाले बताएको छ ।
सत्यवती गाउँपालिकामा आयोजित कार्यक्रमको अध्यक्षता गाउँपालिका सेक्रेटरी एवं युवा संगठन नेपाल जिल्ला सदस्य गम्मर सी र सञ्चालन युवा संगठन नेपाल जिल्ला सदस्य रुक सीले गरेका थिए ।
नेकपा स्थापना दिवसको अवसरमा वालपेन्टिङ
गुल्मी । नेकपा गुल्मीले पार्टीको ७५ औं स्थापना दिवसको सन्दर्भमा वालपेन्टिङ गरेको छ । गुल्मीको पूर्वी क्षेत्रका सत्यवती, चन्द्रकोट र कालीगण्डकीमा वालपेन्टिङ गरेको हो ।
मूल सडकको छेउछाऊ र मुख्य सहरहरुमा वालपेन्टिङ गरेको हो । ७५ औं नेकपा स्थापना दिवसलाई राष्ट्रिय पर्वको रुपमा भव्यताका साथ मनाऔं, नेकपा जिन्दावाद, एकीकृत जनक्रान्ति जिन्दावाद, दलाल संसदीय व्यवस्था मूर्दावाद, वैज्ञानिक समाजवाद जिन्दावाद, वित्तिय संस्थाको ज्यादती बन्द लगायतका नारा लेखिएका छन् ।
केन्द्रीय योजना अन्तर्गत नेकपाले वालपेन्टिङ गरेको हो ।
