शीर्षपंक्तिका शब्दहरु सञ्चारमन्त्री रेखा शर्माका हुन् । एक सार्वजनिक कार्यक्रममा बोल्दै मन्त्री शर्माले सञ्चारमाध्यमहरु सत्ताको भजनमण्डली बन्न नहुने जिकिर गर्दै यस क्षेत्रसम्बन्धी ऐन निर्माणका लागि संसदमा पेस गरिएको जानकारी दिइन् । पछिल्लो समय नेपालमा सञ्चारक्षेत्रको वृद्धि हुँदै गर्दा यसमा देखिएको विकृतिका कारण पनि मन्त्री शर्माको यो भनाइ महत्वपूर्ण मान्न सकिन्छ । प्रेस जगत्बाट स्तुति चाहने राजनीतिक दलहरु र स्तुतिमै रमाउने प्रेस जगत्को पछिल्लो अवस्थामा मन्त्री शर्माको मन्त्रीलाई राम्रो मान्न सकिन्छ । साथै, यस क्षेत्रमा देखिएको विकृति विसंगतिलाई हटाएर कसरी देश र जनताप्रति अझ उत्तरदायी प्रेस जगत् खडा गर्न सकिन्छ भन्ने मन्थन पनि जरुरी रहेको संकेत गर्छ ।
नेपालको इतिहासमा व्यवस्था परिवर्तनका लागि भएका धेरैजसो आन्दोलन र क्रान्तिमा सञ्चारमाध्यमको स्थान उच्च छ । राणाशासनकाल अन्त्य गरी प्रजातन्त्र स्थापना, त्यसपछि पञ्चायत अन्त्य, बहुदल, लोकतन्त्र र गणतन्त्र स्थापनमा प्रेस जगत्ले जहिल्यै पनि महत्वपूर्ण हिस्साको रुपमा आफ्नो भूमिका निर्वाह गर्दै आएको छ । अझ भनौं, सञ्चारमाध्यमले तत्कालीन शासक र व्यवस्थाविरुद्ध निर्भीक भएर जनताको आवाजलाई मुखरित गर्न कुनै कसरत बाँकी छोडेको छैन । त्यही कारणले पनि इतिहासको कसीमा नेपाली सञ्चारमाध्यमको सधैं प्रशंसा नै हुँदै आएको छ । सञ्चारमाध्यमले पछिल्लो समय लोकतन्त्र र गणतन्त्र स्थापनाका क्रममा तत्कालीन शासक वर्गबाट ठूलो चुनौती खेप्नुपरेको थियो । प्रकाशन÷प्रसारणका शासक वर्गको हस्तक्षेप थियो, पत्रकार असुरक्षित थिए । तर यस्तो कठिन अवस्थामा पनि प्रेस जगत्ले कुशलतापूर्वक आफ्नो भूमिका निर्वाह गरेको थियो ।
देशमा लोकतन्त्र गणतन्त्रको स्थापनासँगै स्थिति सहज बनेको छ । तर, प्रेस जगत्लाई पनि आफ्नो निष्पक्ष र निर्भीक चरित्रलाई जोगाउन पनि उत्तिकै कठिन बन्दै गएको छ । अभिव्यक्ति स्वतन्त्रतामा केही सहजताका कारण सञ्चारमाध्यमहरुको संख्यामा बढोत्तरी त भएको छ, तर तिनीहरु पक्षधरतामा बाँडिँदा निष्पक्ष सञ्चारको अभ्यासमा चुनौती थपिएको छ । अहिले पत्रपत्रिका, रेडियो, टिभी, पत्रपत्रिकासँगै अनलाइनको प्रभाव पनि बढ्दै गएको छ । तर, तत्तत् संस्थासँग आबद्ध सञ्चालक, पत्रकार, कर्मचारी आदिको भूमिका भने सन्देहास्पद हुँदै जाँदा माथि मन्त्री शर्माले भनेजस्तै भजनमण्डलीको समूह बन्ने खतरा पनि बढेको छ ।
हुन त पछिल्लो समय सञ्चारमाध्यममा आएको विषय र समाचारको विषयमा पाठक वर्गले पनि प्रश्न उठाउँदै आएका छन् । यसले पाठक वर्ग यसक्षेत्र प्रति सचेत बन्दै गएको स्पष्ट हुन्छ । अर्कोतर्फ राजनीतिक दलहरुले पनि आफ्नो विरोध गर्ने सञ्चारमाध्यमको उछितो काढ्ने र आफ्नो बारेमा राम्रो लेख्नेको प्रशंसा गर्ने प्रवृत्ति बढेको छ । सञ्चारमाध्यम पनि निश्चित नेता, व्यापारीप्रति अनुग्रहित हुँदै उनीहरुको नै स्तुति गाउने र उनीहरुको गल्ती नै नदेख्ने विकृति बढ्दै गएको छ । सोही कारण सञ्चारमाध्यम र पत्रकारप्रति जनमानसमा आकर्षण पनि कम हुँदै गएको छ । कुनै पनि देशको लोकतान्त्रिका अवस्था बलियो बनाउन र समृद्धिलाई अघि बढाउन प्रेस जगत्को भूमिका महत्वपूर्ण हुन्छ । प्रेसलाई सधैं सत्ताको विपक्ष भन्ने पनि गरिन्छ । त्यसैले प्रेस जगत्लाई निष्पक्ष र निर्भीक बनाउन सत्ता, राजनीतिक दल र सरोकारवाला सबै निकायको पहलकदमी आवश्यक छ , आगे सबैलाई चेतना भया ! जनधारणाा साप्ताहिक
