काठमाडौँ – सातदोबाटो युथ क्लबले लगातार तेस्रो खेलमा जित हासिल गरेको छ। दशरथ रङ्गशालामा शनिबार साँझ भएको दिनको दोस्रो खेलमा सातदोबाटोले आफ्नो जित यात्रा कायम राख्ने क्रममा फ्रेन्ड्स क्लबमाथि १–० को जित निकाल्यो।
इन्जुरी समयमा दीपक राज सिंह ठकुरीले गरेको एकमात्र गोल निर्णायक बन्यो। अधिकांश समय गोलरहित बराबरी बनेको खेलमा फ्रेन्ड्सविरुद्ध सातदोबाटोको इन्जुरी समयको थप गरिएको तेस्रो मिनेटमा भाग्यमानी सावित भयो। निरज चौधरीको पासलाई दीपकले डिफेन्डर र गोलरक्षकलाई बिट गर्दै टिमलाई महत्वपूर्ण अग्रता दिलाए।
त्यसअघि दुबै टिमले गोलका केही राम्रा अवसरहरु चुकाएका थिए। ४३ औँ मिनेटमा कप्तान प्रकाश बुढाथोकीको कर्नरमा हेडरमार्फत आएको बललाई रफिक एमिनुले आकर्षक हेड गरे पनि सुशील लामाले गोललाइनबाट बचाउँदा फ्रेन्ड पहिलो हाफमै अग्रता लिनबाट चुकेको थियो।
दोस्रो हाफमा पनि दुबै टिमले गोलका केही राम्रा मौका चुकाए। लगातार तेस्रो जितसँगै सातदोबाटोले शीर्षस्थानको चर्च ब्वाइज युनाइटेडसँग समान ९ अङ्क बनाएको छ। सातदोबाटोले पहिलो खेलमा एनआरटीलाई २–१ ले तथा दोस्रो खेलमा एपीएफलाई १–० ले पराजित गरेको थियो।
फ्रेन्ड्सको भने यो जारी लिगमा दोस्रो हार हो। पहिलो खेलमा एफसी खुमलटारसँग १–० ले पराजित भएको फ्रेन्ड्सले दोस्रो खेलमा थ्री स्टारसँग ३–३ गोलको बराबरी खेलेको थियो।
