काठमाडौं । नेकपा एमालेका तर्फबाट राष्ट्रपतिका उम्मेदवार सुवासचन्द्र नेम्वाङलाई सहयोग गर्न गरेको अपिलमा एकीकृत समाजवादीले रामचन्द्र पौडेलको प्रस्तावक बनिसकेको जवाफ फर्काएको छ।
आगामी २५ गते हुने राष्ट्रपति निर्वाचनमा एमालेका उम्मेदवार नेम्वाङलाई सहयोग गर्न अपिल गर्दै एमाले नेताहरू नेकपा एसको केन्द्रीय कार्यालय पुगेका थिए। उपाध्यक्ष विष्णु पौडेल, नेम्वाङ र उपमहासचिव पृथ्वी सुब्बा गुरुङ त्यहाँ पुगेका थिए। तर, भेटमा एकीकृत समाजवादीका नेताहरूले आफ्नो पार्टी पौडेलको प्रस्तावक बसिसकेको जवाफ दिए। नेकपा एसका अध्यक्ष माधवकुमार नेपाल र पदाधिकारीहरुसँगको भेटपछि एमाले उपमहासचिव गुरुङले पहिलो पटक नेकपा एसको कार्यालयमा सबै पदाधिकारीसँग भेट भएको जनाए ।
उनले भेट सकारात्मक भएको भन्दै चुनौतीका बीचमा दुई पार्टीबीचको एकतालाई अगाडि बढाउने अवसर प्राप्त भएको प्रतिक्रिया दिए । नेकपा एसका प्रवक्ता जगन्नाथ खतिवडाले नेम्वाङसहितको टोलीले राष्ट्रपतिमा सहयोगको अपिल गरेको जानकारी गराए । उनले एमालेसँग पहिलोपटक औपचारिक भेटवार्ता भएकोमा अध्यक्ष नेपालले धन्यवाद दिएको जानकारी पनि दिए।
एमालेले औपचारिक सम्वाद सुरु गरेकोमा खुसी लागेको खतिवडाको प्रतिक्रिया रहेको छ। तर, बुधबार बसेको केन्द्रीय सचिवालयको बैठकले समेत रामचन्द्र पौडेललाई राष्ट्रपतिमा सहयोग गर्ने निर्णय गरिसकेकाले दायाँबायाँ नहुने नहुने प्रतिक्रिया पनि उन्ले दिए ।
