काठमाडौं । बलिउड पछिल्लो साता ‘हेराफेरी ३’को चर्चाले गर्मायो । फेब्रुअरी २१ देखि छायांकन सुरु भएसँगै यो कमेडी सिक्वेलको चर्चाले अरु कुरालाई ओझेलमा पार्यो । यो श्रृंखलामा अक्षय कुमार, सुनिल शेट्टी र परेश रावल शीर्ष भूमिकामा छन् । फरहाद सम्जीले चलचित्रको प्रोमो खिचिरहेको तस्वीर पनि सार्वजनिक भएकाे छ ।
अहिले आएर चलचित्रलाई लिएर दुईवटा नयाँ खबर छ । पहिलो, अब चलचित्रको शीर्षक ‘हेराफेरी ३’ नभएर ‘हेराफेरी ४’ हुनेछ । बलिउड हंगामाका अनुसार यो चलचित्रको खलपात्रमा सञ्जय दत्तले अभिनय गर्नेछन् । स्रोतले भन्यो, ‘सञ्जय दत्तले चलचित्र साइन गरेका छन् । फिल्ममा उनी एक विरोधीको भूमिकामा देखिने जनाइएको छ । उनको चरित्र दृष्टिविहीन छ र धेरै विचित्र छ । उनले हेराफेरी श्रृंखलामा पागलपनको अंश थप्ने अपेक्षा गरिएको छ ।’
स्रोतले अगाडि भन्यो, ‘सञ्जय दत्त कमेडी भूमिकामा उत्कृष्ट छन् र निर्माताले यो भूमिकाका लागि उनलाई सही ठहर्याएका छन् । उनको कास्टिङले चलचित्रको ब्राण्डमा अझै मूल्य थप्नेछ । उनी हेराफेरी युनिभर्समा एक रोमाञ्चक पात्र हुनेछन् । दर्शकले उनलाई राजु (अक्षय कुमार), श्याम (सुनिल शेट्टी) र बाबुराव गणपतराव आप्टे (परेश रावल) सँग अभिनय गरेका हेर्न पाउनेछन् ।’
‘हेराफेरी ४’ मा अरशद वारसीलाई अनुबन्ध गरिएको खबर पनि आएको छ तर स्रोतले यो कुराको पुष्टि गर्न सकेन । जे होस्, सञ्जय दत्त र अरशद वारसीको पुनर्मिलनले केही फ्यानलाई उत्साहित बनाएको छ । किनभने दुवैलाई मुन्नाभाइ फ्रेन्चाइजीमा क्रमशः मुन्नाभाइ र सर्किटको रूपमा मन पराइएको छ ।
यसैबीच, मिड-डेसँगको अन्तर्वार्तामा परेश रावलले हेराफेरी ४ को छायांकन तीन महिनाभित्र सुरु हुने र मुम्बईका साथै विदेशी लोकेसनमा पनि हुने बताए । उनले भने, ‘बाबु भैय्या, राजु र श्याम विदेश गएकाले अबुधाबी, दुबई र लस एन्जलस जस्ता स्थानमा पनि चलचित्रकाे छायांकन हुनेछ । तिनीहरूले विश्वव्यापी रूपमा हेराफेरी गर्नेछन् ।’
