इन्जुरी समयमा आर्सनलले लगातार दुई गोल गरेपछि एस्टन भिल्लासँगको सम्भावित बराबरी टार्दै महत्वपूर्ण जित हासिल गरेको छ। ६ गोल भएको खेलमा एस्टन भिल्लाले सुरुवाती अग्रता जोगाउन नसक्दा आर्सनल ४-२ ले विजयी भयो।
सुरुवातबाटै रोमान्चक बनेको खेलमा पाँचौं मिनेटमा ओली वाट्किन्सको गोलमार्फत घरेलु टोली एस्टन भिल्लाले अग्रता लियो। तर खेलको १६ औं मिनेटमा बुकायो साकाले गोल गर्दै आर्सनललाई १-१ गोलको बराबरीमा ल्याए।
तर पुन घरेलु दर्शकमाझ अग्रता बनाउने क्रममा ३१ औं मिनेटमा फिलिपे कौटिन्होले गोल गर्दै एस्टनलाई २-१ को अग्रता दिलाए। पहिलो हाफको अग्रताका बावजुत दोस्रो हाफमा पुन आर्सनल खेलमा फर्कियो। ६१ औं मिनेटमा ओलेक्सान्डर जिनचेन्कोले गोल गर्दै आर्सनललाई २-२ गोलको बराबरीमा ल्याए।
तर नाटकीय बनेको इन्जुरी समय आर्सनल लगातार दुई गोल गर्न सफल भयो। जोर्गिन्होको सट पोलमा लागरे बाहिरिएको बलमा लडेका गोलरक्षक इमिलियानो मार्टिनेजसँग डिफ्लेक्टेड भएर गोल भएपछि आर्सनलले खेलमा ३-२ को अग्रता बनायो। चौंथो गोल इन्जुरी समयको आठौं मिनेटमा गाब्रियल मार्टिनेलीले खाली पोस्टमा गोल गरेका थिए। केहि सेकेन्ड बाँकी रहँदा सबै खेलाडी अगाडि बढेको मौकामा काउन्टर अट्याकमा खाली पोस्टमा गाब्रियलले गोल गरेका थिए।
जितसँगै आर्सनल सिटीको खेल अघि सम्म पुन शीर्ष स्थानमा फर्किएको छ। आर्सनलले २३ खेलमा ५४ अङ्क जोडेको छ। एस्टन भिल्ला भने २३ खेलमा २८ अङ्क जोडेर ११ औं स्थानमा रहेको छ।
