टर्कीमा गएको शक्तिशाली भूकम्पमा परी मृत्यु हुनेकाे संख्या २२ हजार ३०० भन्दा बढी पुगेकाे छ। विश्व स्वास्थ्य संगठनले केही दिनअगाडि भूकम्पमा परी २० हजारभन्दा बढीकाे ज्यान जान सक्ने बताएकाे थियाे। टर्की र सिरियाको सीमा क्षेत्रमा सोमबार बिहान बिहान ७.५ रेक्टर स्केलको भूकम्प गएको थियाे। भूकम्पले करिब ६ हजार भवनमा क्षति पुर्याएकाे छ। यद्यपि, संयुक्त राष्ट्र संघले भूकम्पबाट भएको क्षतिको तस्बिर अझै स्पष्ट नभएको जनाएको छ। भूकम्पपछि टर्कीमा आपतकालको घोषणा गरिएको छ। टर्कीको राजधानी अंकारासहितका सहरहरूका साथै लेबनान, सिरिया, साइप्रससम्म पनि भूकम्पको धक्का महसुस भएको थियो। टर्कीका राष्ट्रपति रजेप तैयप एर्दोगानले जुन तरिकाले राहत तथा उद्दारकाे कार्य हुनुपर्ने हाे, त्याे हुन नसकेकाे स्वीकार गरेका छन्। सिरियामा राहत पुर्याउन निकै मुस्किल भएकाे छ। विशेष गरी सरकारी र विद्राेही सेना लडिरहेकाे क्षेत्रमा। यसैबीच, भूकम्पबाट बाँचेका हजारौँ जनताका लागि अत्यधिक चिसो चुनौती बनेको छ। धेरै मानिसहरू खुला आकाशमुनि सुत्न बाध्य छन्।
