भारत र अस्ट्रेलियाबीच जारी ४ खेलको टेस्ट सिरिजको पहिलो खेलमा भारतले प्रभावशाली जित निकालेको छ। नागपुर टेस्टमा घरेलु टोली भारतले अस्ट्रेलियालाई इनिङ र १३२ रनले पराजित गर्दै सिरिजमा रवाफिलो जित हासिल गरेको हो। जितसँगै भारतले सिरिजमा १–० को अग्रता बनाएको छ। नागपुरस्थित जामथा क्रिकेट स्टेडियममा तेस्रो दिन नै जित निकाल्ने क्रममा भारतका लागि रवीचन्द्रन आश्विनले ५ तथा मोहम्मद सामी र रवीन्द्र जडेजाले समान २–२ विकेट लिएका थिए। तेस्रो दिन दोस्रो इनिङ सुरु गरेको अस्ट्रेलिया भारतीय बलर सामु निरीह रह्यो। उसले ९१ रन जोड्दा सम्पूर्ण विकेट गुमाएको थियो। उसका लागि स्टिभ स्मिथको अविजित २५ रन सर्वाधिक रह्यो। उनीबाहेक अन्यक कुनै पनि ब्याटरले गतिलो प्रदर्शन गर्न सकेनन्। दोस्रो इनिङमा डेभिड वार्नर र एलेक्स क्यारीले समान १०–१० रन बनाउँदा मार्नुस लुवुसेनले १७ रन बनाउनु दोहोरो स्कोरका रुपमा रह्यो। त्यसअघि आफ्नो पहिलो इनिङमा अस्ट्रेलियाले १७७ रन मात्र बनाएको थियो। जवाफमा भारतले पहिलो इनिङमा ४ सय रनको विशाल स्कोर तयार गरेको थियो। भारतका लागि रोहित शर्माले १२० रनको कप्तानी इनिङ खेल्दा अक्षर पटेलले ८४ रन तथा रवीन्द्र जडेजाले ७० रन बनाएका थिए। जडेजाले पहिलो इनिङमा अस्ट्रेलियाको ५ विकेट समेत हात पारेका थिए। थप दोहोरो स्कोरका रुपमा मोहम्मद सामीले ३७ रन बनाउँदा रवीचन्द्रन आश्विनले २३ तथा केएल राहुलले २० रन बनाएका थिए। विराट कोहली भने १२ रनमा आउट भए। अस्ट्रेलियाका लागि पहिलो टेस्ट खेलिरहेका टोडी मुर्फीले ७ विकेट लिए पनि फराकिलो हारबाट बच्न भने अस्ट्रेलिया असफल रह्यो। प्याट कुमिन्सले २ विकेट लिँदा नाथन लियोनले १ विकेट लिएका थिए।
