दाङ । जिल्लामा रहेको त्रिशिद्धेश्वरी राप्ती यातायात सेवा प्रालिले पहिलो पटक सुतेर यात्रा गर्न मिल्ने बस सञ्चालनमा ल्याएको छ। साबिक राप्ती अञ्चलमा यस्तो सुविधा भएको बस भित्रिएको पहिलो पटक हो। नयाँ ल्याइएका एउटा बसको मूल्य ८० लाख बढी परेको प्रालिका अध्यक्ष सुरेश हमालले जानकारी दिए। टाटा कम्पनीका यी नयाँ बसहरू भारतबाट ल्याइएका हुन्।
यात्रुहरूको सुविधालाई मध्यनजर गर्दै बुधबारबाट दाङदेखि काठमाडौं रात्रि सेवामा ‘स्लिपर एसी’ बस सञ्चालन गर्ने उनले जानकारी दिए। दाङदेखि काठमाडौंसम्म लामो यात्रामा जाने यात्रुहरूको सहजताका लागि रात्रि सेवाका यात्रुले आरामदायीपूर्वक सुत्न मिल्ने सिट रहेका ४ वटा एयर सस्पेन्स स्लिपर बस सञ्चालन गर्न लागेको अध्यक्ष हमालले जानकारी दिए।
यो बसमा ४० सिट छन्। तीमध्ये ८ जना सुतेर यात्रा गर्न मिल्ने र ३२ सिटहरू बसेर यात्रा गर्न मिल्ने रहेको उनको भनाइ छ। दाङदेखि काठमाडौंसम्म सिटमा बसेर यात्रा गर्नका लागि एउटा यात्रुले १ हजार ८ सय र सुतेर यात्रा गर्न चाहने यात्रुले २ हजार रुपैयाँ भाडादर तय गरिएको पनि उनले बताए।
प्रालिले यात्रुको सुविधालाई मध्यनजर गर्दै क्रमिक रुपमा डिलक्स, एसी, ब्यू स्काइ, सेभेन स्टारपछि पछिल्लो समय सुतेर यात्रा गर्ने सुविधा युक्त बसहरू ल्याएको हो।
यस्तै उनले सेवा सुधार गर्दै लगेको र भविष्यमा पनि यात्रुका गुनासो सम्बोधन गर्दै थप सुधार्दै जाने पनि बताए। उनले छिट्टै अनलाइन टिकट बुकिङ खुला गरिने पनि बताए उनले गाडी चालक, सहचालक र बसपार्कका टिकट काउन्टरहरूमा काम गर्ने कर्मचारीहरूको व्यवहार परिवर्तन गर्ने सवालमा आफूहरू कटिबद्ध भएर लाग्न पनि बताए।
यस्तै प्रत्येक महिना चालक र सहचालकहरुको स्वास्थ्य परिक्षण गर्ने योजना रहेको पनि जानकारी दिए।
२०४१ सालमा स्थापना भएको साबिक राप्ती अञ्चल सार्वजनिक बस व्यवसायी समिति राज्यको पछिल्लो नीति अनुरूप प्रालिमा गएको हो। यो प्रालिसँग करिब ६ बसहरू सञ्चालनमा रहेको र २ हजार बढीले रोजगारी पाइरहेको प्रालिका प्रशासनिक सचिव प्रकाश भट्टले जानकारी दिए।
उनका अनुसार मुलुकका बिभिन्न ५० जिल्ला र भारतको दिल्ली, सिम्ला लगायतका क्षेत्रमा प्रालिले बस सञ्चालन गरेर सेवा दिँदै आएको छ। यो प्रालि भौतिक पूर्वाधार र जग्गाको दृष्टिकोणले नेपालकै सबै भन्दा धनी छ।
प्रालिले यातायात दुर्घटना न्यूनिकरणका लागि जिल्लाका विभिन्न स्थानमा विश्वकर्मा बाबाका मन्दिरहरू र प्रतीक्षालय निर्माण गरेको जनाएको छ। प्रालिले दृष्टिविहीन यात्रुहरूलाई निःशुल्क र अपांग यात्रुहरूलाई ५० प्रतिशत सम्म छुट दिँदै आएको समेत जनाएको छ। प्रालिले फागुन १२ र १३ गते दोश्रो अधिवेशन तथा चौथो साधारण सभा कार्यक्रम गर्दै छ। उक्त दिन एक जना व्यवसायीलाई गोला प्रथाबाट एउटा बस उपहार दिने पनि जनाएको छ।
