काठमाडौं । नेकपा राष्ट्रिय एकता अभियानका अध्यक्ष एबम् राष्ट्रिय सभाका सांसद वामदेव गौतमले भ्रष्टाचार नियन्त्रणका लागि संसद्बाट मन्त्री हुने व्यवस्था हुनुपर्नेमा जोड दिनु भएको छ । अहिलेको शासन प्रणाली नै भ्रष्टाचारको मुख्य स्रोत भएको भन्दै गौतमले भ्रष्टाचार नियन्त्रणका लागि प्रत्यक्ष निर्वाचित कार्यकारी शासन प्रणालीमा जानुपर्ने सुझाव राख्नु भएको छ ।
‘हाम्रो शासन प्रणाली गलत छ । संसद्बाट मन्त्री छान्ने व्यवस्था रहुन्जेल भ्रष्टाचार नियन्त्रण हुन्न झन ध्वस्त हुन्छ,’ गौतमले भने ‘त्यसैले प्रत्यक्ष निर्वाचित कार्यकारीको व्यवस्था होस् र संसद्बाट मन्त्री हुने व्यवस्थाको अन्त्य होस् ।’
गौतमले अहिलेको शासन प्रणालीले सांसद निर्वाचित गर्नका लागि धेरै पैसा खर्च गराउँछ । जसले जानेको छ र सुधार गर्न चाहन्छ त्यसलाई अनेकथरी जालझेल गरेर हराइन्छ । कार्यक्रममा उनले बाउबाजेको पुरानो प्रणाली भनेर अहिलेको पक्षमा नलाग्न सुझाव दिनु भएको छ ।
गौतमले भ्रष्टाचारको नियन्त्रणका लागि भूमिमाथि व्यक्तिको स्वामित्व पनि समाप्त गर्नुपर्नेमा जोड दिनु भएको छ ।
‘हाम्रो प्रमुख स्रोत भूमि हो त्यसैलै भूमिमाथि व्यक्तिको स्वामित्व रहने व्यवस्था अन्त्य गरिनुपर्छ । व्यक्ति, समूह र कम्पनीले कुनै उत्पादनको काम गर्नुपर्यो भने लीजमा जग्गा लिनुपर्छ,’ गौतमले भन्नु भयो ।
यस क्रममा उहाँले भ्रष्टाचारले देशलाई बर्बाद पारेको भन्दै चिन्ता व्यक्त गर्नु भयो । ‘भ्रष्टाचार गर्नेले देशलाई बर्बाद गर्छन्, समाजलाई बर्बाद गर्छन् र परिवारलाई बर्बाद गर्छन् । भ्रष्टाचारको जड शासन प्रणालीमै छ,’ उहाँले भन्नु भयो ।
निरंकुश शासन हुँदैमा भ्रष्टाचार नियन्त्रण नहुने पनि उहाँको भनाइ थियो । उहाँले भन्नु भयो- ‘चीनले भ्रष्टाचार हुनै नदिने नीति अख्तियार गरेको छ, तर प्रत्येक वर्ष १० देखि १५ हजार व्यक्तिलाई भ्रष्टाचारको अभियोगमा मृत्युदण्ड दिइरहेको छ,निरंकुश शासन ल्याएर भ्रष्टाचार नियन्त्रण गर्न सकिन्छ भन्ने कुरा गलत हो । एकै व्यक्तिले नियन्त्रण गर्न सक्दैन । जनतामा भ्रष्टाचार विरोधी भावना र संस्कृतिको विकास गरिनु पर्छ । त्यसैअनुसारको प्रणाली र विधिसम्मत रुपमा तत्कालै कारबाही गर्नुपर्छ ।’
