अमेरिकी विदेशमन्त्री एन्टोनी ब्लिन्केनले अन्तर्राष्ट्रिय शक्ति सन्तुलनमा चीन अमेरिकाको एक मात्र प्रतिद्वन्द्वी भएको बताएका छन्।
ब्लिन्केनका अनुसार रुसले स्वतन्त्र र खुला अन्तर्राष्ट्रिय प्रणालीको लागि तत्काल खतरा खडा गरेको छ भने जनवादी गणतन्त्र चीन अन्तर्राष्ट्रिय शक्ति सन्तुलन र आर्थिक, कूटनीतिक, सैन्य र प्राविधिक शक्तिको सन्दर्भमा संयुक्त राज्य अमेरिकाको एक मात्र प्रतिद्वन्द्वी हाे
अमेरिकी विदेशमन्त्रीले ताइवानको खाडीमा शान्ति र स्थिरता कायम गर्न अमेरिका प्रतिबद्ध रहेको दोहोर्याएका छन्।
उनले चीनको सिन्जियाङ र तिब्बतमा मानवअधिकार उल्लङ्घन, हङकङमा अभिव्यक्ति स्वतन्त्रता र प्रेस स्वतन्त्रताको हननका विषयमा प्रश्न उठाउने काम जारी राख्ने पनि बताए।
चीनले ताइवानलाई एक स्वशासित टापुको रूपमा हेर्दै आइरहेकाे छ। उसले ताइवान छिट्टै चीनमा विलय हुने पनि बताउँदै आइरहेकाे छ।
उत्तर कोरियाको आणविक अभियान र क्षेप्यास्त्र परीक्षणको मुद्दामा ब्लिन्केनले यस मामिलाको समाधानमा चीनको महत्त्वपूर्ण भूमिका रहेको आराेपसमेत लगाए।
उनले भने, ‘अरू मुलुककाे तुलनामा चीनको उत्तर कोरियासँग गहिरो सम्बन्ध छ।’
चीनले विवादित साउथ चाइना सागरलाई पूर्ण रूपमा आफ्नो दाबी गर्दै आएको छ भने यसको केही भागमा ताइवान, फिलिपिन्स, ब्रुनाई, मलेसिया र भियतनामले दाबी गर्दै आएका छन्।
चीनले दक्षिण चीन सागरमा धेरै कृत्रिम टापुहरू बनाएको छ र त्यहाँ सैन्य संरचनाहरू खडा गरेको छ। पूर्वी चीन सागरमा जापान र चीनबीच विवाद छ।
दक्षिण चीन सागर र पूर्वी चीन सागरमा प्रचुर मात्रामा खनिज, तेल र अन्य प्राकृतिक स्रोतहरू रहेको बताइएको छ। यसबाहेक, यो क्षेत्र विश्वव्यापी व्यापारको लागि धेरै महत्त्वपूर्ण छ।
यस विवादित क्षेत्रमा अमेरिकाको कुनै दाबी नभए पनि दक्षिण चीन सागरमा चीनको बढ्दो वर्चस्व र दाबीलाई चुनौती दिन अमेरिकाले यहाँ आफ्ना लडाकु युद्धपोत र लडाकु विमान पठाउँदै आएको छ।
समुद्रमा व्यापारिक मार्गलाई स्वतन्त्र राख्न र रणनीतिक रूपमा संवेदनशील क्षेत्रमा हवाई निगरानीको अधिकारका लागि आफूले यस्तो गरेको विदेशमन्त्री ब्लिन्केनकाे भनाइ छ।
