बन्धक बनाइएका सुरक्षाकर्मी रिहाइका लागि माओवादीको शर्त, वार्ताका लागि तयार



access_time 07 Apr 2021

काठमाडौं/भारतीय कम्युनिष्ट पार्टी (माओवादी) ले छत्तिसगढको बीजापुरमा भएको आक्रमण र आफ्नो नियन्त्रणमा रहेका सुरक्षाकर्मीको रिहाईका बारे वार्ताका लागि तयार रहेको जनाएको छ ।

समाचार संस्था एएनआईका अनुसार माओवादीले विज्ञप्ति निकालेर बीजापुर आक्रमणमा २४ सुरक्षाकर्मीको ज्यान गएको, ३१ जना घाइते भएको र एक सुरक्षाकर्मी आफ्नो नियन्त्रणमा रहेको जनाएको छ ।

विज्ञप्तिमा भनिएको छ, ‘सो मुठभेडमा पिपुल्स लिब्रेशन गुरिल्ला आर्मीका चार जवानको पनि ज्यान गएको छ । यो घटनाका सम्बन्धमा हामी सरकारसँग वार्ताका लागि तयार छौँ । सरकारले मध्यस्तकर्ताको घोषणा गर्न सक्ने छ । वार्तापछि हामी नियन्त्रणमा रहेका सरकारी सुरक्षाकर्मीलाई रिहा गर्ने छौँ ।’

आम रुपमा प्रहरी आफूहरुका दुश्मन रहेको पनि विज्ञप्तिमा माओवादीले उल्लेख गरेको छ । विज्ञप्तिमा भनिएको छ, ‘सुकमा र बीजापुर जिल्लाका गाउँमा आक्रमणका लागि दुई हजार भन्दा धेरै प्रहरी जवान आएका थिए । यसको योजना अमित शाहको नेतृत्वमा बनाइएको थियो ।’

२०२० को नोभेम्बरदेखि सुरु भएको सरकारी सैन्य अभियानको क्रममा १५० भन्दा धेरै स्थानीय बासिन्दा मारिएको माओवादीले जनाएको छ ।

मोदी–शाह नेतृत्वको सरकारले हत्याकाण्डको योजना बनाए पनि ती सबै योजनाको जनयुद्ध मार्फत गम्भीर जवाफ दिने वक्तव्यमा उल्लेख छ ।



Share Your Thoughts