काठमाडौँ — काठमाडौं उपत्यका अपराध अनुसन्धान कार्यालयले ७१ लाख ८० हजार रुपैयाँसहित पटके हुन्डी कारोबारमा संलग्न भारतीय नागरिकलाई पक्राउ गरेको छ । प्रहरीका अनुसार पक्राउ पर्नेमा भारत हिमाञ्चल प्रदेश सिमलाथाना घरभई काठमाडौं महानगरपालिका–१४ कुलेश्वरस्थित चामुण्डा फ्रुट सेन्टरका सञ्चालक ४९ वर्षीय विजयकुमार गुप्ता छन् ।
काठमाडौंको कुलेश्वर क्षेत्रमा नेपाल राष्ट्र बैंकले जारी गरेको आदेश/निर्देशन विपरीत इजाजतपत्र नलिइ वित्तिय कारोबार (हुण्डी) गर्दै आएको सूचनाको आधारमा प्रहरीले गुप्तालाई सोमबार पक्राउ गरेको जनाएको छ । प्रहरीले हुन्डी गर्ने प्रयोजनको लागि संकलन गरेको नगद ५७ लाख रुपैयाँ र १४ लाख ८० हजार रकम बराबरको ३ थान चेक गरी ७१ लाख ८० हजार रुपैयाँ बरामद गरेको कार्यालयका सूचना अधिकारी एसपी सोमेन्द्रसिंह राठौरले जानकारी दिए । उनीलाईविरुद्ध नेपाल राष्ट्र बैंक ऐन, २०५८ को दफा ९५ बमोजिम आवाश्यक कारबाहीका लागि जिल्ला प्रहरी परिसर टेकु पठाएको जनाएको छ ।
गुप्ताले फलफूल व्यवसायको आवरणमा लामो समयदेखि अवैध हुन्डीको कारोबार गर्दै आएको प्रारम्भिक अनुसन्धानमा खुलेको एसपी राठौरले बताए । उनले २०७५ साउन ७ गते भारतीय रुपैयाँ २ लाख र नेपाली ३१ लाख रुपैयाँसहित पक्राउ परेका थिए । उनीविरुद्ध राजस्व छली सम्बन्धि कसुरमा राजस्व अनुसन्धान विभाग पुल्चोकबाट कारबाही भोगेको प्रहरीले जनाएको छ ।
