झापा – प्रतिनिधिसभाका सभामुख देवराज घिमिरेले सत्ता साझेदार दल नेकपा एमालेका केन्द्रीय सदस्य दुर्गा प्रसाईंको नागरिक बचाऔं महाअभियानबारे सरकार र एमालेले प्रष्ट धारणा ल्याउनु पर्ने बताएका छन् ।
उनले संविधान र पार्टीको नीति विपरित गतिविधि गर्नेप्रति सरकार र पार्टीको धारणा आउनुपर्ने बताए ।
झापाको बिर्तामोडमा शुक्रबार पत्रकारहरूसँग कुरा गर्दै सभामुख घिमिरेले प्रसाईंका गतिविधि लगायत सरकारभित्र वा बाहिर रहेका दलका नेता तथा सांसदका गतिविधि तथा अभिव्यक्ति संविधानविपरीत हुने गरेको बताए ।
उनले भने, ‘यस्ता गतिविधि मलाई मात्र अनकम्फर्टेबल भएको होइन । एमालेका नेताको राजतन्त्र चाहिन्छ भन्दै गतिविधि हुनुले संविधानको मर्मवपरित हो कि होइन भन्ने कुरा सबैलाई थाह छ । यसबारे सरकार र पार्टीको धारणा आउनुपर्छ ।’
राष्ट्रपति विद्यादेवी भण्डारीले प्रमाणित नगरेको नागरिकता विधेयक अब नव्युँतिने उनले बताए ।
उनले नागरिकतालगायत अन्य निस्क्रिय भएका विधेयक अब नयाँ तरिकाबाट संसदमा पेश गरिनुपर्ने बताए ।
अब बन्ने राष्ट्रपतिका बारेमा मतदाताले छिनोफानो गर्ने विषय रहेको उनको भनाइ थियो ।
सांसदहरूले मत दिएर चुनिने राष्ट्रपतिका विषयमा पार्टीहरूले छलफल गर्ने भन्दा पनि मतदाता सांसदले टुंगो लगाउने विषय भएको सभामुख घिमिरेले बताए ।
उनले प्रधानन्यायाधीश चोलेन्द्र शमशेर जबराविरुद्धको महाअभियोगको प्रस्तावलाई पनि निश्चित समयभित्र टुंगोमा पुर्याउने विषयमा छलफल भइरहेको बताए ।
