काठमाडौं । अख्तियार दुरुपयोग अनुसन्धान आयोगले नेपाल बीमा प्राधिकरणका अध्यक्ष सूर्य प्रसाद सिलवालविरुद्ध भ्रष्टाचार मुद्दा दायर गरेको छ।
आयोगले सोमबार विशेष अदालत काठमाडौंमा फरक फरक जन्ममिति कायम गरि प्राधिकरणको अध्यक्षमा बहाल रहेको भन्दै मुद्दा दायर गरेको हो। सिलवालको जन्म मिति २०१५ साउन १५ गते भएको स्वीकार गरे पनि फरक फरक ठाउँमा फरक जन्ममिति उल्लेख गरी नागरिकता, पासपोर्टसहितका अरु कागजात लिएको आयोगको अनुसन्धानबाट खुलेको प्रवक्ता नरहरि घिमिरेले जानकारी गराए ।
सिलवाल आफैँले स्वीकार गरेको जन्म मितिका आधारमा २०८० साल साउन १५ गते नै अवकास लिनुपर्ने भए पनि २०१८ साल जन्ममिति भएको दाबीसहित पदमा बहाल रहेको भन्दै मुद्दा दायर गरेको हो। अभियोग पत्रमा उल्लेख गरिएको छ, ‘६५ वर्ष पूरा भएमा स्वतः अवकाश हुनेछ” भनि स्पष्ट कानूनी व्यवस्था रहेको देखिएकोमा सो कानूनी व्यवस्थालाई स्वीकार गरी निजले मिति २०७७।१०।२२ स्वःघोषणा तथा शपथ ग्रहण गरी पद स्वीकार गरेवाट निज सूर्य प्रसाद सिलवाल क्ष्उकय ाबअतय (स्थापित तथ्यका आधारमा) मिति २०८०।०४।१५ मा अवकाश भई नेपाल बिमा प्राधिकरणको अध्यक्षको ओहदा नपाउनेमा जानी जानी सो ओहदामा बहाल रहेको…।’ आयोगले सिलवालले २०८० साउन १५ गतेपछि प्राप्त गरेको ३६ लाख ६२ हजार १५४ रुपैयाँ असुल गर्न माग गरेको छ। सिलवाल निजामति सेवाबाट २०७३।०४।१५ गते अनिवार्य अवकाश प्राप्त गरेका थिए। त्यस आधारमा उनले २०१५।०४।१५ लाई नै जन्म मिति कायम र स्वीकार गरे गराएको भए पनि कूटनीतिक राहदानी तथा विशेष राहदानी प्राप्त गर्न उनले भरेको पासपोर्ट फार्म आफ्नो जन्म मिति २०१८ कात्तिक २४ गते उल्लेख गरेको पाइएको आयोगको भनाइ छ।

