काठमाडौं । ‘मिस्टर नेपाल २०२४’को विजेता सन्तोष लोक्सम लिम्बु भियतनाम पुगेका छन् । ‘मिस्टर वर्ल्ड २०२४’मा नेपालको प्रतिनिधित्व गर्दै उनी त्यहाँ पुगेका हुन् ।
भियतनामको बिन्ह थुएनको नोभावर्ल्ड फान थियटरमा २३ नोभेम्बरमा ‘मिस्टर वर्ल्ड २०२४’को फाइनल प्रतिस्पर्धा हुनेछ । प्रतियोगिताको यो ११औँ संस्करण हो । जसमा नेपालसहित ७२ राष्ट्रका प्रतिनिधि उपाधिका लागि भिड्नेछन् । नेपालको सहभागिता भने यो पाचौँ हो ।
भियतनाम उड्नु अगाडि सन्तोषलाई जितको शुभकामना दिन त्रिभुवन अन्तर्राष्ट्रिय विमानस्थलमा मिस्टर नेपाल आयोजक संस्था एक्सपोज नेपालकी सिइयो अर्चना थापा, सदस्य मोहन बस्नेत लगायत पुगेका थिए । Shivam Cement उड्नु अगाडि सञ्चारकर्मीसँग कुराकानी गर्दै सन्तोषले ‘मिस्टर वर्ल्ड २०२४’ मा नेपालको प्रतिनिधित्व गर्न पाउँदा गर्व महसुस भएको बताए । ‘म देश चिनाउने उद्देश्यका साथ प्रतियोगितामा जान लागेको हो’, सन्तोषले भने ‘धेरैको सपना बोकेर प्रतियोगितामा जाँदै छु । देशको सुन्दरता प्रस्फुटन गर्नेछु ।’ उनले शीर्ष उपाधि नेपाल ल्याउन भरसक कोसिस गर्ने बताएका थिए ।
नेपालमा ‘मिस्टर नेपाल २०२४’ गत भदौमा आयोजना भएको थियो । जसमा सन्तोषले शीर्ष उपाधि हासिल गरेका थिए ।
