सत्ताबाट बाहिरिनु परेको नेकपा माओवादी केन्द्र अहिले आफैं आन्तरिक कलहमा अल्झेको छ । अध्यक्ष पुष्पकमल दाहाल प्रचण्डको अहिले पार्टीभित्र चर्को आलोचना भइरहेको छ । प्रचण्ड पनि अहिले आफ्नो आलोचना गर्ने माओवादी उपमहासचिव जनार्दन शर्मासँग प्रतिवादमा उत्रिएका छन् । माओवादीका तत्कालीन नेता मोहन वैद्य र बाबुराम भट्टराई अलग भइसकेपछि अध्यक्ष पुष्पकमल दाहालको ‘लाइन र लिडरसिप’ माथि पहिलोपटक लिखित रूपमा प्रश्न उठेको छ । पछिल्लो स्थायी समितिमा उपमहासचिव जनार्दन शर्मा र सचिव राम कार्कीले लिखित र मौखिक रूपमा ‘लाइन र लिडरसिप’ माथि प्रश्न उठाएका हुन् । पार्टीमा फरक मत आउनु राम्रो कुरा भए पनि त्यसैको कारण पार्टी फुट्ने वा फुटाइने हल्ला गरिनु राम्रो पक्ष होइन ।
यसअघि पार्टीमा फरक मत राख्दा राज्य सत्ताको दुरुपयोग गरेर आफूमाथि दमन गरिएको र पार्टी फुटाउन खोजेको गलत आरोप लगाइएको शर्माको भनाइ थियो । गत तर गत शनिबार माओवादीको रुकुम–काठमाडौं सम्पर्क मञ्चको सम्मेलनमा शर्माले प्रचण्डको निर्देशनअनुसार आफू कहिले एमाले, कहिले कांग्रेससित सहकार्य गर्न पुगेको सन्दर्भ उल्लेख गर्दै ‘कहिले एमाले र कहिले कांग्रेस’ भएको होइन, अत्याचार पनि खेपेको’ बताए । सम्मेलनमा प्रचण्डले आफू र जनार्दनबीच विश्वास र आशंकाको सम्बन्ध रहँदै आएको उल्लेख गर्दै ‘आगो बाल्न अगुल्टो ठोसेको’ टिप्पणी गरेका छन् । ‘मेरो र प्रभावकार (शर्मा) बीच बेलाबेला अगुल्टो ठोसिएझैं हुने गरेकै छ । यो आगो बाल्ने काम खाना पकाउनका लागि भएको छ,’ उनले भने, ‘मेरो अघि हुँदा मलाई महान् नेतृत्व भन्ने र बाहिर गएपछि धारेहात लगाउने प्रवृत्ति बढेको छ । यसपटक प्रभाकरजीको मनको कुरा बाहिर आओस् भन्ने थियो । मैले प्रभाकरले पार्टी फुटाउँदैछ भनेको होइन,’ उनले भनेका छन् ।
माओवादीभित्रको यस्तो आरोपप्रत्यारोप र फुटको जोखिम कम्युनिस्ट आन्दोलन भने जोखिममा परेको छ । अहिले देशमा एमाले र कांग्रेसबीचको अप्राकृतिक गठबन्धनका कारण पुनः वामपन्थी शक्तीहरु ध्रुवीकृत हुने अवसर मिलेको छ । यसलार्य सदुपयोग गर्न जरुरी छ । अब वामपन्थी, कम्युनिस्ट र समाजवादी शक्तिहरुबीच ध्रुवीकरण गरी जनताका मुद्दाहरुलाई उठाउनुपर्छ । नेपालमा वाम र समाजवादीबीच ध्रुवीकरण आवश्यक भइसकेको छ । आर्थिक समृद्धिका लागि समाजवादी क्रान्ति अघि बढाउन पनि यस्तो शक्ति आवश्यक छ । माओवादी नेतृत्वको समाजवादी मोर्चाले संघीयता, लोकतन्त्र, सुशासन, समृद्धि र सामाजिक आर्थिक न्यायसहितको नेपाली विशेषताको समाजवादको स्थापना गर्ने प्रमुख उद्देश्य लिएको छ । त्यसलाई पूरा गर्ने अभीष्टका साथ नेताहरु एकजुट हुनुपर्छ । देशमा विद्यमान रहेको राष्ट्रिय राजनीतिक, आर्थिक, सामाजिक एवं सांस्कृतिक समस्या र चुनौतीको सामना गर्न तथा राष्ट्रिय राजनीतिमा पश्चगामी, यथास्थितिवादी र अग्रगामी राजनीतिक प्रवृत्ति विद्यमान रहेको वर्तमान अवस्थामा देशलाई अग्रगामी निकास दिन समाजवादी शक्तिहरूको एकताबद्ध पहलकदमी आवश्यक छ । प्रतिपक्षमा रहने माओवादीले जनादेशको तथ्यलाई विश्वास गरी संगठन निर्माणमा लाग्नुपर्छ, न कि फुटेर आफैं सकिने बाटोमा । जनधारणा साप्ताहिक
