काठमाडौँ- मन्त्रिपरिषद् बैठकले बुधबार क्रसर उद्योगलाई थप नियमन गर्न तीनबुँदे निर्णय गरेको छ। बिनाअनुमति सञ्चालनमा रहेका क्रसर उद्योगहरुलाई बन्द राख्ने निर्णय गरेको सरकारले एक कदम अगाडि जाँदै थप नियम ल्याएको हो। सरकारले बिनाअनुमति सञ्चालनमा रहेका क्रसर उद्योगहरुलाई प्रतिबन्ध लगाउने निर्णयलाई निरन्तरता दिएको छ। त्यस्तै, आयोजना विशेषका लागि खुलेका र आयोजनाको अवधि सकिएपछि पनि सञ्चालनमा रहिरहेका क्रसर उद्योगहरुलाई बन्द गर्ने निर्णय पनि मन्त्रिपरिषद्ले गरेको एक मन्त्रीले जानकारी दिए। त्यस्तै, मापदण्ड नपुगेका क्रसर उद्योगहरुलाई मापदण्ड पूरा गर्न असार मसान्तसम्मको समय पनि दिने निर्णय गरिएको छ। सरकारले मंगलबार आफैँलाई आगो लगाएर ज्यान गुमाएका प्रेम आचार्यले लगाएका आरोपहरुको छानबिन गर्न गृहमन्त्रालयलाई जिम्मा दिने निर्णयसमेत गरेको छ।
