काठमाडौं । चालु आर्थिक वर्ष २०८०/८१ को दोस्रो त्रैमासमा सिद्धार्थ बैंकको नाफा सामान्य घटेको छ । बैंकले बिहीबार प्रकाशित गरेको दोस्रो त्रैमासको वित्तीय विवरणमा १ अर्ब १३ करोड ६८ लाख रुपैयाँ मुनाफा आर्जन गरेको छ ।
गत आर्थिक वर्ष २०७९/८० को दोस्रो त्रैमासमा १ अर्ब १६ करोड १२ लाख रुपैयाँ मुनाफा आर्जन गरेको बैंकको नाफा १.१० प्रतिशतले घटेको हो । बैंकको खुद ब्याज आम्दानी र खुद फी तथा कमिसन आम्दानीमा वृद्धि भएको छ । यस्तै सम्भावित कर्जा नोक्सानीको लागि गरेको प्रोभिजन (इम्पेरीमेन्ट चार्ज) मा सामान्य घट्दा पनि बैंकको नाफामा घटेको छ । बैंकको सञ्चालन खर्चमा वृद्धि हुँदा नाफा प्रभावित भएको हो ।
आम्दानीमा वृद्धि हुँदा सम्भावित कर्जा नोक्सानीको लागि गरेको प्रोभिजन १ अर्ब १९ करोड २५ लाख रुपैयाँबाट सामान्य घटेर १ अर्ब १८ करोड ४१ लाख रुपैयाँ पुगेको छ । तर, कर्मचारी खर्च १ अर्ब ४१ करोड ८४ लाखबाट बढेर १ अर्ब ४६ करोड ५५ लाख पुगेको छ । यस्तै अन्य सञ्चालन खर्च ५८ करोड ३२ लाखबाट बढेर ६२ करोड ३५ लाख पुगेको छ । जसले बैंकको सञ्चालन नाफा र नाफा घटेको हो ।
नाफा घटेको बैंकले ५४ करोडढ रुपैयाँ ब्याज उठाउन सकेको छैन । चालु आर्थिक वर्षको ६ महिनामा ३७ करोड ५० लाख घाटामा रहेको बैंकको गत आवको मुनाफाबाट लाभांश वितरणपछिको सञ्चित नाफासहित ३० करोड ४५ लाख रुपैयाँ सञ्चित नोक्सानीमा रहेको छ ।
चालु आर्थिक वर्षमा बैंकको निक्षेप घटेको छ भने कर्जामा सुधार भएको छ । असार मसान्तमा २ खर्ब २३ अर्ब ६५ करोड ४७ लाख रुपैयाँ रहेको बैंकको कुल निक्षेप पुस मसान्तमा आउँदा घटेर २ खर्ब २१ अर्ब ७ करोड ८३ लाख पुगेको छ । यस्तै बैंकको कर्जा १ खर्ब ८४ अर्ब ९६ लाख रुपैयाँबाट १ खर्ब ९० अर्ब ९१ करोड ५२ लाख रुपैयाँ पुगेको छ ।
नाफा घटेसँगै प्रतिसेयर आम्दानी १६ रुपैयाँ ५३ पैसाबाट घटेर १६ रुपैयाँ १८ पैसा झरेको छ । प्रतिसेयर नेटवर्थ १८२ रुपैयाँ ७८ पैसा र मूल्य आम्दनी अनुपात १५.४५ गुणा रहेको छ ।
यस्तै बैंकको पूँजीकोष ३३ प्रतिशतबाट ११.६८ प्रतिशतमा झरेको छ । निष्कृय कर्जा अनुपात २.८७ प्रतिशतबाट २. ५६ प्रतिशतमा झरेको छ । पुसमा बैंकको सीडी रेसियो ८१.७७ प्रतिशत, आधार दर ९.२८ प्रतिशत र औसत स्प्रेड दर ३.९९ प्रतिशत रहेको छ ।
