काठमाडौं । प्रधानमन्त्री पुष्पकमल दाहाल (प्रचण्ड) ले विभिन्न मन्त्रालयको कामकारबाहीबारे जानकारी लिएका छन्। सोमबार प्रधानमन्त्री तथा मन्त्रिपरिषद् कार्यालयमा विभिन्न मन्त्रालयका सचिव र विभागीय प्रमुखहरुलाई बोलाइ त्यसका कामकारबाहीको विवरण लिएका हुन्।
सरकार प्रमुखको हैसियतले प्रधानमन्त्री प्रचण्डले विभिन्न मन्त्रालय र निकायहरुको कामकारबाही जानकारी लिने काम सुरु गरेका सरकारका मुख्यसचिव शंकरदास बैरागीले जानकारी गराए । त्यसक्रममा सचिवहरुले आ–आफ्नो मन्त्रालयको प्रगति विवरण र आफूहरुले भोग्नु परेको समस्याका बारेमा प्रधानमन्त्री प्रचण्डसमक्ष ब्रिफिङ गरेका थिए।
‘विभिन्न मन्त्रालयहरुबाट संक्षेपमा प्रस्तुति भएको छ। केही निकायहरु बाँकी छन्। त्यो भोलि (मंगलबार) सबैको विवरण लिइसकेपछि प्रधानमन्त्रीज्यूको निर्देशन आउँछ,’ मुख्यसचिव बैरागीले भने।
सबै मन्त्रालय र विभागको ब्रिफिङ लिएपछि प्रधानमन्त्री प्रचण्डले मंगलबार निर्देशनात्मक सम्बोधन गर्ने मुख्य सचिव बैरागीले जानकारी गराए ।
‘सरकार प्रमुखका रुपमा विभिन मन्त्रालय, निकायहरुले कसरी काम गरिरहेका छनरु के भईराखेको छ। हाम्रो विकासको गति कस्तो छरु त्यो सरकार प्रमुखले जान्ने स्वभाविक प्रक्रिया नै हो। त्यही सन्दर्भमा छलफल भएको हो। सचिवज्यूहरुले आ–आफ्नो मन्त्रालयका इस्युहरु र आफूले भोग्नु परेका समस्याबारे राख्नु भएको छ। त्यसको सम्माननीय प्रधानमन्त्रीज्यूबाट सम्बोधन भोलि (मंगलबार) हुन्छ,’ मुख्यसचिव बैरागीले भने।
सबै मन्त्रालयका सचिवहरुले सोमबार नै सबै विवरण भने प्रधानमन्त्रीसमक्ष पेश गर्न सकेका छैनन्। मुख्यसचिव बैरागीका अनुसार मंगलबार पुनः छलफल हुने र प्रधानमन्त्री दाहालले नेपाल सरकार सचिवहरुलाई निर्देशन दिनेछन्।
प्रधानमन्त्री भएपछि प्रचण्डले पहिलोपटक विभिन्न मन्त्रालयका कामकारबाहीबारे चासो लिएका हुन्। प्रधानमन्त्री दाहालले आफू प्रधानमन्त्री नियुक्त भएलगत्तै आर्थिक विकास र सुशासन आफ्नो मुख्य काम हुने प्रतिबद्धता व्यक्त गरेका थिए।
