काठमाडौं । भारतीय फिल्मी कलाकार रीना रायँको जीवनी समेटिएको पुस्तक ‘विश्व विख्यात महान कलाकार रीना रायँको जीवनी’ काठमाडौंमा विमोचन गरिएको छ ।
नेपाल प्रज्ञा प्रतिष्ठानको सभा हलमा नेपाली राष्ट्रिय समाज सेवा परिषद्को आयोजनामा भएको कार्यक्रममा कलाकार टंक तिमिल्सिना, प्रेम कैदी, डा. युद्ध एस. रौनियार र गोकुल पन्तले संयुक्त रूपमा पुस्तक विमोचन गरेका थिए ।
नेपालका प्रथम पत्रकार स्वर्गीय रघुनाथ प्रसाद रौनियारका जुम्ल्याहा छोरा रमेश कुमार रौनियार र उमेश कुमार रौनियारले पुस्तक लेखेका हुन् । पुस्तकका लेखकद्वयले भारतीय कलाकार रीना रायँको जीवनी लेख्न पाएकोमा खुसी व्यक्त गर्दै नेपालमा लेखक तथा कलाकारको सम्मानमा फोटो प्रदर्शनी गर्न संग्रहालय स्थापना गर्नुपर्ने धारणा राखे ।
कार्यक्रममा लेखकद्वयले आफूहरूलाई फेसबुकमार्फत ‘प्रभु प्रसाद’ले रीना रायँको जीवनी लेख्न प्रेरित गरेको बताए । उनीहरूले ‘कलम यस्तो प्रयोग हो, जसले संसार नै बदल्न सक्ने हतियार हो’ भन्ने धारणा पनि व्यक्त गरे ।
राजनीतिक अभियन्ता तथा पत्रकार प्रेम कैदीले इतिहासका आधारमा रौनियार समुदायलाई हजारौँ वर्षअघि भगवान् श्रीकृष्णसँग समेत जोडिएको विषय उल्लेख गर्दै भारतीय कलाकार रीना रायँको जीवनी नेपालमा विमोचन गर्न पाएकोमा खुसी व्यक्त गरे । इनोभा हस्पिटलका अध्यक्ष गोकुल पन्तले डा. प्रिन्स रौनियारको भूमिकाका कारण रीना रायँको जीवनी प्रकाशन हुन सकेको बताए । नेपालमा फिल्मी कलाकार रीना रायको जीवनी प्रकाशित हुनु गौरवको विषय भएको धारणा राखे ।
कलाकार टंक तिमिल्सिनाले लेखकद्वय रमेश कुमार रौनियार र उमेश कुमार रौनियारलाई बधाई दिँदै भारतीय फिल्मी कलाकार रीना रायँको जीवनी नेपालमा प्रकाशन हुनु राष्ट्रकै प्रतिष्ठा बढाउने विषय भएको जनाए ।
कार्यक्रममा मनिष मानवले लेखकद्वयले राष्ट्रका दर्जनौँ इतिहास लेख्दा समेत सम्मान गर्न नचाहनु दुःखद भएको बताए । राज्य र समाज मिलेर लेखकद्वयलाई सम्मान दिलाउनुपर्ने उनको धारणा थियो । डा. युद्ध एस. रौनियारले भारतीय कलाकार रीना रायँको सम्पूर्ण जीवनी कलात्मक रूपमा लेखेर नेपालमा प्रकाशन गर्नु लेखकद्वयका साथै नेपालको प्रतिष्ठासँग जोडिएको विषय भएको जनाए ।
समाजसेवी रेखा रौनियारले कार्यक्रममा स्वागत मन्तव्य दिएकी थिइन् । सीमा रौनियार र मञ्जु रौनियारले अतिथिहरूलाई खादा लगाइदिएका थिए । कार्यक्रमको अध्यक्षता पत्रकार तथा राजनीतिक अभियन्ता प्रेम कैदीले गरेका थिए ।
