काठमाडौं। नेपाली कांग्रेसको १५औँ महाधिवेशन आजदेखि काठमाडौंको खुलामञ्चमा सुरु भएको छ। उद्घाटन समारोहमा कांग्रेसका नेता–कार्यकर्तासँगै विभिन्न राजनीतिक दलका शीर्ष नेताहरू सहभागी छन्।
महाधिवेशनमा ७ हजार ६ सयभन्दा बढी प्रतिनिधि सहभागी भएका। महाधिवेशनले कांग्रेसको आगामी नेतृत्व र पार्टीको नीति तथा संगठनात्मक दिशासमेत तय गर्नेछ।
गत पुसमा सम्पन्न विशेष महाधिवेशनबाट सभापतिमा चयन भएका गगन थापा नेतृत्वको कांग्रेसले विधानअनुसार १५औँ महाधिवेशन आयोजना गरेको हो। थापा विशेष महाधिवेशनबाट सभापतिमा चयन भएका थिए।
उद्घाटन समारोहमा राष्ट्रिय स्वतन्त्र पार्टी (रास्वपा) का सभापति रवि लामिछाने, नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’, राप्रपा अध्यक्ष राजेन्द्र लिङ्देन तथा एमालेका महासचिव शंकर पोखरेललगायत नेता सहभागी छन्।
जनमत पार्टीका अध्यक्ष सीके राउत भने आफ्नो पार्टीको दोस्रो महाधिवेशन वीरगञ्जमा चलिरहेकाले कांग्रेसको उद्घाटनमा सहभागी भएनन्। जनता समाजवादी पार्टी नेपालका अध्यक्ष उपेन्द्र यादवको स्थानमा सहअध्यक्ष शरतसिंह भण्डारी सहभागी भएकाछन्।
कांग्रेसको १५औँ महाधिवेशनको उद्घाटनपछि सोमबार र मंगलबार बन्दसत्र सञ्चालन हुनेछ। नयाँ नेतृत्व चयनका लागि असोज २१ र २२ गते निर्वाचन गर्ने कार्यतालिका छ।
महाधिवेशनमा सभापति गगन थापाले राजनीतिक प्रतिवेदन तथा उपसभापति विश्वप्रकाश शर्माले आर्थिक तथा अन्य विषय समेटिएको प्रतिवेदन प्रस्तुत गर्ने कार्यक्रम छ। महाधिवेशनले पार्टीको आगामी नीति, नेतृत्व र संगठनात्मक संरचनाबारे निर्णय गर्नेछ।
