काठमाडौं । कम्युनिष्ट आन्दोलनका वरिष्ठ नेता तथा पूर्वप्रधानमन्त्री झलनाथ खनाल र नेपाल संघीय समाजवादी पार्टीका केन्द्रीय अध्यक्ष मो.रिजवान अन्सारीबीच समसामयिक राजनीतिक परिस्थिति, मुलुकमा देखिएको राजनीतिक संकट र त्यसको निकासका विषयमा छलफल भएको छ।
भेटवार्तामा राजनीतिक तथा सामाजिक उपलब्धिको रक्षा गर्दै थप उपलब्धिका लागि आवश्यक संघर्षलाई प्रभावकारी बनाउने विषयमा विचार–विमर्श भएको जनाइएको छ।
दुवै नेताले मुलुकलाई सुशासन, समृद्धि, दिगो शान्ति, समानता, स्वतन्त्रता र सामाजिक न्यायको दिशामा अघि बढाउन अग्रगामी शक्तिहरूबीच सहकार्य आवश्यक रहेको धारणा राखेका छन्। राष्ट्रिय स्वाधीनता, जनअधिकारको संरक्षण तथा लोकतान्त्रिक मूल्य–मान्यताको सुदृढीकरणका विषयमा समेत छलफल भएको बताइएको छ।
भेटका क्रममा वरिष्ठ नेता खनालले ‘अग्रगामी मोर्चा’को घोषणाप्रति खुसी व्यक्त गर्दै बधाई दिएका थिए। उनले वर्तमान परिस्थितिमा सबै अग्रगामी तथा प्रगतिशील शक्तिहरूलाई समेटेर सहकार्य र मोर्चाबन्दी अघि बढाउनुपर्नेमा जोड दिएका थिए।
नेपाल संघीय समाजवादी पार्टीका अध्यक्षले पनि वर्तमान राजनीतिक संकटबाट मुलुकलाई निकास दिन वाम, लोकतान्त्रिक, प्रगतिशील तथा उत्पीडित समुदायको अधिकारका पक्षमा रहेका शक्तिहरूबीच व्यापक सहकार्य आवश्यक रहेको बताएका थिए।
अग्रगामी शक्तिलाई एक ठाउँमा ल्याउने पहल
भेटवार्तामा देशभित्र रहेका वाम, लोकतान्त्रिक र प्रगतिशील शक्तिका साथै उत्पीडित समुदायको अधिकारका लागि संघर्षरत राजनीतिक शक्तिहरूलाई एउटै मोर्चामा ल्याउने विषयमा समेत छलफल भएको छ।
नेपाली जनताका आकांक्षा र अपेक्षालाई सम्बोधन गर्दै संविधान तथा लोकतान्त्रिक गणतन्त्रका उपलब्धिको रक्षा गर्ने र बाँकी अधिकारका लागि संघर्षलाई थप सशक्त बनाउने विषयमा सहकार्य अघि बढाउने समझदारी बनेको जनाइएको छ।
त्यस्तै, राज्यलाई जनउत्तरदायी, पारदर्शी र सुशासनमुखी बनाउने तथा राष्ट्रिय स्वाधीनता, सामाजिक न्याय, समानता र समृद्धिका मुद्दालाई केन्द्रमा राखेर राजनीतिक सहकार्य विस्तार गर्ने विषयमा समेत नेताहरूबीच छलफल भएको बताइएको छ।
