शिक्षामन्त्री सस्मित पोखरेलले विश्वविद्यालयमा अब भागबण्डाको राजनीति अन्त्य गर्ने जनाएका छन्।
त्रिभुवन विश्वविद्यालयको ६७औँ वार्षिकोत्सवका अवसरमा आयोजित कार्यक्रममा बोल्दै विश्वविद्यालयमा हुने राजनीतिकरणलाई अबको चार वर्षभित्र पूर्ण रूपमा अन्त्य गर्ने बताए। सरकारका प्रवक्ता समेत रहेका पोखरेलले भने, ‘यसभन्दा अघिसम्म विश्वविद्यालयमा हुने राजनीतिकरणलाई हामीले अबको ४ वर्षमा पूर्ण रूपमा अन्त्य गर्नेछौँ। भागबण्डाको राजनीति होइन, मेरिटोक्रेसीको आधारमा विश्वविद्यालयको टिम अब निर्माण हुनेछ।’
उनले विश्वविद्यालयमा कुनै पनि राजनीतिक हस्तक्षेप नहुने जनाए ।
उनले थपे, ‘राजनीतिक रूपबाट कसलाई कहाँ राख्ने, सरुवा, बढुवा वा नियुक्ति गर्ने जस्ता दबाबहरू विश्वविद्यालयमा कहिल्यै आउने छैनन्। यदि त्यस्तो दबाब आयो भने शिक्षा मन्त्रालयलाई तुरुन्त जानकारी गराउनुहोला।
हामीले मेरिटोक्रेसीको आधारमा विश्वविद्यालयलाई अगाडि बढाउन काम गर्नेछौँ।’ उनले आफ्नो वा अन्य पार्टीबाट दबाब आएमा त्यसलाई रोक्ने जनाए ।
मन्त्री पोखरेलले भने, ‘अब विश्वविद्यालयमा जे हुन्छ, मेरिटोक्रेसीको आधारमा हुन्छः जे हुनुपर्ने हो, त्यही हुन्छ, राजनीतिक आधारमा केही पनि हुने छैन। हामीले देखेको सपना कुनै धेरै ठूलो सपना होइन।’
