काठमाडौं । शंखरापुर नगरपालिका-३ साँखु जहरसिंह पौवास्थित सडकमा बा. ४ ख ८७८८ नम्बरको बस अनियन्त्रित भई बुधबार साँझ दुर्घटना हुँदा बसमा सवार ५ जनाको मृत्यु भएको छ । मृत्य हुनेहरूमा काठमाडौं बुढानिलकण्ठ बस्ने बाँके कोहलपुर नगरपालिका-५ घर भएकी ४९ वर्षीया कामना शर्मा, काठमाडौं बुढानिलकण्ठ बस्ने ताप्लेजुङ घर भएकी ५१ वर्षीया इन्दिरा लिम्बु, काठमाडौं पेप्सीकोला बस्ने सिराहा घर भएकी ५५ वर्षीया शान्ती गुप्ता, काठमाडौं गोठाटार बस्ने पाँचथर फिदिम घर भएका ५८ वर्षीय देबेन्द्र लिम्बु र काठमाडौं गोकर्णेश्वर नगरपालिका-५ जोरपाटी बस्ने ५५ वर्षीय अर्जुन लामीछाने रहेका छन् । दुर्घटनामा गम्भीर घाइते भएका उनीहरू मध्ये कामनाको शंखरापुर अस्पतालमा, इन्दिराको स्तुपा सामुदायिक अस्पतालमा, शान्ति, देवेन्द्र र अर्जुनको नेपाल मेडिकल कलेजमा उपचारको क्रममा मृत्यु भएको हो । साथै दुर्घटनामा घाइते भएका चालक समेत बसमा सवार अन्य २३ जनाको विभिन्न अस्पतालमा उपचार भइरहेको छ ।
मोरङ, लेटाङ नगरपालिका-९ जाँते स्थित सडकमा जाँतेबाट पथरीतर्फ जाँदै गरेको मे. ६ प २५९४ नम्बरको मोटरसाइकल अनियन्त्रित भई बुधबार राति दुर्घटना हुँदा चालक मोरङ पथरी शनिश्चरे नगरपालिका-१० बस्ने ३२ वर्षीय बिजय गुरूङको मृत्यु भएको छ । दुर्घटनामा गम्भीर घाइते भएका उनको न्यूरो अस्पताल विराटनगरमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
