-सबि भट्टराई
जनताको आकांक्षा अनुसार अहिलेका दुई लोकप्रिय पात्रबीच मिलाप भएको छ । रास्वपा सभापति रवि लामिछाने र काठमाडौं महानगरपालिकाका मेयर बालेन शाहबीच आगामी चुनावमा सहकार्य गर्ने समझदारी भएको छ । कमलपोखरीस्थित रास्वपा नेता असिम शाहको निवासमा सोमबार राति चलेको छलफलले पुरै देशलाई तरंगित बनायो । भेटपछि दुवै नेता मुस्कुराउँदै एउटै गाडीमा बाहिरिएका तस्बिरहरू सामाजिक सञ्जालमा भाइरल भए, र जनतामा नयाँ आशाको लहर दौडियो । यो भेट केवल दुई व्यक्तिको मिलन मात्र होइन, पुरानो राजनीतिको जञ्जिर तोड्ने नयाँ सम्भावनाको संकेत हो ।
रवि लामिछाने र बालेन शाह दुवै युवा पुस्ताका आइकन हुन् । रवि, पूर्व पत्रकार र टेलिभिजन होस्टबाट राजनीतिमा उदाएका नेता, जसले सहकारी प्रकरणको जेलयात्रापछि पनि जनताको साथ जितेका छन् । रिहा भएलगत्तै उनले वैकल्पिक शक्तिहरूसँग संवाद थालेका थिए । बालेन त झन् इन्जिनियर, ¥यापर र स्वतन्त्र मेयर, जसले फोहोर व्यवस्थापनदेखि सडक सुधारसम्मका कामले जनताको मन जितेका छन् । दुवैले पुराना दलहरूको भ्रष्टाचार, परिवारवाद र अस्थिरताविरुद्ध आवाज उठाएका छन् । यो भेटमा रास्वपाबाट डीपी अर्याल र असिम शाह, बालेन पक्षबाट कुमार बेन र निश्चल बस्नेत सहभागी थिए । छलफलका मुख्य विषय थिए – सुशासन, युवा नेतृत्व, आगामी चुनावी सहकार्य र वैकल्पिक शक्तिहरूको एकता । असिम शाहले यो भेटलाई ’कथाको सुखद सुरुवात’ भनेका छन्, ‘दुई दाजुभाइको मिलन, देशले खोजेको आशाको संगम ।’
यो भेटले राजनीतिक वृत्तमा ठूलो हलचल मच्चाएको छ । पुराना दलहरू – कांग्रेस, एमाले र माओवादी – लामो समयदेखि सत्ताको सिन्डिकेट चलाउँदै आएका छन् । तर जेन–जी आन्दोलनपछि युवाहरूको असन्तुष्टि चुलिएको बेला यो भेट आएको छ । रविले चितवन अदालतमा तारेख बुझ्दै पत्रकारहरूसँग भने, ‘परिवर्तनका लागि जुटेका वैकल्पिक शक्तिहरूलाई एक ठाउँमा ल्याउने प्रयास हो यो ।’ यदि रवि र बालेनले चुनावी गठबन्धन गरे भने काठमाडौंदेखि राष्ट्रिय स्तरसम्म ठूलो प्रभाव पर्नेछ । बालेनको स्थानीय लोकप्रियता र रास्वपाको राष्ट्रिय आधारले पुराना दलहरूलाई कडा चुनौती दिन सक्छ । कतिपयले यो पपुलिजमको नयाँ रूप भनेका छन्– सोसल मिडिया र व्यक्तिगत छविमा आधारित । तर यो तरंगले पुरानो प्रणालीलाई हल्लाउने निश्चित छ । एकातिर ओली–देउवा भेटले पुरानो सत्ता समीकरणको संकेत दिँदा, अर्कोतिर रवि–बालेन भेटले नयाँ ध्रुवीकरणको झलक दिएको छ ।
जनतामा यो भेटले कस्तो उमंग जगाएको छ ? सामाजिक सञ्जालमा अहिले रवि–बालेन ह्याट्सट्याग ट्रेन्डिङ छ । युवाहरूले उत्साहित हुँदै लेखेका छन्– ‘अन्ततः नयाँ नेतृत्वको सुरुवात !’ काठमाडौंका बासिन्दा बालेनको कामबाट पहिल्यै खुसी थिए, अब रविसँगको सहकार्यले देशव्यापी परिवर्तनको सपना देख्दैछन् । जेन–जी पुस्ता, जसले पुराना दलहरूबाट निराशा भोग्यो, यो भेटलाई युवा क्रान्तिको संकेत मान्दै छ । यो उमंग केवल भावनात्मक मात्र होइन, ठोस आशा हो – किनकि दुवै नेताले कामले प्रमाणित गरेका छन् । तर यो उमंगलाई कायम राख्न अझै ठोस योजना चाहिन्छ, नत्र निराशा बढ्न सक्छ ।
उनीहरूबीच पुराना दलको दबदबा कम गर्न नयाँ दलहरू मिलेर जाने विषयमा छलफल भएको थियो । बालेनले आगामी फागुन २१ मा तोकिएको प्रतिनिधिसभा निर्वाचनमा एक भएर जाँदा युवाले मुलुकको नेतृत्व गर्ने अवसर आउने बताएका थिए । भेटवार्तामा भएका ठोस विषय सार्वजनिक नगरिए पनि मिलेर अघि बढ्नुपर्ने आवश्यकता र राजनीतिक सहकार्यका विषयमा सकारात्मक संवाद भएको नेताहरूको भनाइ छ । भेटलाई पछिल्लो समय दुवै पक्षबीच देखिएको राजनीतिक दूरी घटाउने प्रयासका रूपमा पनि हेरिएको छ । उनीहको भेटलाई रास्वपाका नेताहरुले एकदमै ऐतिहासिक र सुखद भविष्यको संकेतको रुपमा व्याख्या गरेका छन् । भेटवार्ताप्रति रास्वपाका केन्द्रीय सदस्य तथा पूर्वसांसद असिम शाहले सुखद सुरुवात भएको बताएका छन् । कारागारबाट रवि छुटेपछि बालेनसँगको भेटलाई उनले नेपाली राजनीतिमा सुखद सुरुवात भएको बताएका हुन् । उनले रवि र बालेनको भेटलाई दुई दाजु भाइको मिलनको संज्ञासमेत दिएका छन् । उनले यो व्यक्तिले नभएर देशले खोजेको आशाको मिलन भएको दाबी गर्दै सबै नेपालीलाई बधाई समेत दिए ।
यो भेटका सकारात्मक पक्ष धेरै छन् । यसले युवा नेतृत्वको उदयलाई बलियो बनाउँछ, पारदर्शी राजनीतिलाई प्रोत्साहन गर्छ र महिलादेखि अल्पसंख्यकसम्मको प्रतिनिधित्व बढाउन सक्छ । यदि कुलमान घिसिङ, हर्क साम्पाङ जस्ता अन्य लोकप्रिय अनुहार पनि जोडिए भने यो अभियान अझ शक्तिशाली बन्नेछ । तर चुनौती पनि छन्– दुवैको व्यक्तिवादी शैलीले आन्तरिक कलह निम्त्याउन सक्छ, पुराना दलहरूले षड्यन्त्र गर्न सक्छन् ।
निष्कर्षमा, रवि–बालेन भेट नेपालको राजनीतिमा ऐतिहासिक मोड साबित हुन सक्छ । यसले पुराना दलहरूलाई चुनौती दिँदै जनतामा नयाँ उमंग भरेको छ । यदि यो भेटले ठोस एकता र योजना जन्मायो भने, नेपालले नयाँ युगको सुरुवात गर्नेछ । दुवै नेताले अहंकार त्यागेर जनकेन्द्रित बाटो समातून्, तब यो तरंग जनबिरोधीहरुा लागि त्रासको बिषय बन्न सक्ने छ, त्यो नै जनअपेक्षा पनि हो । जनधारणा साप्ताहिक
