काठमाडौं । एक महिने शिक्षक आन्दोलनपश्चात आजदेखि विद्यालय खुलेका छन् ।
बुधबार सरकार र शिक्षक महासंघबीच ९ बुँदे सहमति भएपछि आजदेखि विद्यालय खुलेकाे हाे ।
बिहीबार सार्वजनिक बिदा भएकाले आजदेखि विद्यालयमा भर्ना अभियान सुरु गरिएको विद्यालयका काठमाडौंका सरकारी विद्यालयका प्रधानाध्यापकहरूले जनाएका छन् । ‘नयाँ विद्यार्थी भर्नाको लागि आएका छन् ।
आज मात्र ८० जना नयाँ विद्यार्थी भर्ना भएका छन्,’ पद्मकन्या माध्यामिक विद्यालयकी प्रधानाध्यापक रिता तिवारीले भनिन्, ‘आज बुक फ्रि–फ्राइडे हो । विद्यार्थीहरू आएर अतिरिक्त गतिविधिमा सहभागी भएका छन् ।’पद्मकन्यामा १० कक्षासम्म ५ सय विद्यार्थी अध्ययनरत छन् । जनविकास माध्यामिक विद्यालयका प्रधानाध्यापक अनिल झाले पनि विद्यालय सञ्चालन भएको जनाए । ‘आजदेखि विद्यालय खुलेको छ । विद्यार्थी भर्नाका लागि आइरहेका छन्,’ झाले भने । उनका अनुसार अघिल्लो वर्ष करिब साढे ४ सय विद्यार्थी थिए ।
१ वैशाखबाट नयाँ शैक्षिकसत्र सुरु भएको थियो तर आन्दोलनका कारण १९ दिनपछि मात्र विद्यार्थी भर्ना अभियान सुरु भएको छ । १७ वैशाखमा सरकार र शिक्षक महासंघबीच ९ बुँदामा सहमति भएपछि शिक्षकहरु काठमाडौंबाट फर्किएका छन् । तर महासंघले सरकारसँग धोकापूर्ण सहमति गरेको भन्दै विद्यालय कर्मचारी परिषद्ले भने नयाँ आन्दोलन घोषणा गरेको छ ।
विद्यालय कर्मचारी परिषद्ले यही वैशाख २१ गतेदेखि जेठ तीन गतेसम्म कालोपट्टी बाँधेर कार्यक्षेत्रमा काम गर्ने, जेठ ४ गते ७ सय ५३ वटै स्थानीय तहमा ध्यानाकर्षण पत्र बुझाएर आन्दोलनबारे जानकारी गराउने, जेठ ५ गते जिल्लागत आन्दोलन परिचालन समिति गठन गर्ने जनाएको छ । त्यस्तै, जेठ ६ गते ७७ वटै शिक्षा विकास तथा समन्वय इकाईमा आन्दोलनको जानकारीसहित ध्यानाकर्षण पत्र बुझाउने, जेठ ७ गते ७ वटै प्रदेशमा आन्दोलनको जानकारी गराउने र ध्यानाकर्षण सहित सामाजिक विकास मन्त्रालयमा पत्र बुझाउने तथा जेठ १० गतेदेखि काठमाडौंस्थित माइतीघर मण्डलामा सडक आन्दोलन शुरु गर्ने विद्यालय कर्मचारी परिषद्ले जनाएको छ ।
