दाङ । रास्वपा दाङले लुम्बिनी प्रदेश राजधानीबाट संगठन विस्तार, जनसम्पर्क र आगामी निर्वाचन केन्द्रित अभियान सुरु गर्ने भएको छ ।
दाङमा प्रदेश कार्यालय उदघाटनसँगै प्रदेशस्तरको संगठन सुदृढीकरण र जनतासँग प्रत्यक्ष संवादका कार्यक्रम अघि बढाउन लागिएको हो ।
रास्वपा दाङका जिल्ला सभापति किरण खनालले प्रदेश राजधानीबाट संगठन विस्तारको अभियान सुरु गर्न लागिएको बताए । ‘संगठन विस्तारसहितको अभियान हामी प्रदेश राजधानीबाटै सुरु गर्दैछौँ,’ सभापति खनालले भने, ‘यो विस्तार अब स्थानीय तह, प्रदेश र निर्वाचन क्षेत्र हुँदै वडा तथा टोलसम्म पुग्ने छ ।’
सभापति खनालका अनुसार सांसद समेत रहेका रास्वपा महामन्त्री आचार्यले भोलि दाङ जिल्लाका सबै कार्यालय प्रमुखहरुसँग छलफल गर्ने कार्यक्रम छ । सो कार्यक्रममा जिल्लामा विकास निर्माणको अवस्था तथा सरकारका काम र प्राथमिकताका विषयमा जानकारी आदानप्रदान गर्दै छलफल गर्ने तयारी छ ।
साथै असोज २२ गते पर्यटन मन्त्री खडकराज पौडेल (गनेश) पनि दाङ जिल्ला जाने कार्यक्रम छ । उनी तुलसीपुरस्थित टरीगाउँको विमानस्थल अवलोकनमा जाने लगायतका कार्यक्रम छ । वर्तमान सरकारले टरीगाउँ विमानस्थल विस्तारका लागि बजेटसमेत विनियोजना गरेको छ ।
रास्वपाले स्थानीय तहको निर्वाचनलाई लक्षित गर्दै देशभर संगठन विस्तार र उम्मेदवार छनोटसम्बन्धी तयारी अघि बढाइरहेको छ । पार्टीले ७७ जिल्लाका ७५३ वटै पालिकामा सांसद तथा केन्द्रीय सदस्यलाई परिचालन गर्ने गरी अभियान सञ्चालन गर्ने जनाएको छ ।
अभियानमा स्थानीय सरकारका कामकारबाही, पार्टीका नीतिगत पहल तथा आगामी निर्वाचनका लागि उम्मेदवार छनोट प्रक्रियाबारे नागरिकसँग संवाद गर्ने विषय समेटिएको छ ।
दाङमा नयाँ नेतृत्व, संगठन विस्तारको जिम्मेवारी
रास्वपा दाङको प्रथम जिल्ला अधिवेशनबाट ३४ वर्षीय किरण खनाल जिल्ला सभापतिमा निर्वाचित भएका हुन् । निर्वाचनमा खनालले १९६ मत प्राप्त गरेका थिए भने उनका निकटतम प्रतिस्पर्धी विनय घिमिरेले १२४ मत पाएका थिए ।
दाङका तीनवटै निर्वाचन क्षेत्रमा क्षेत्रीय नेतृत्वसमेत चयन भइसकेको छ । निर्वाचन संयोजकका अनुसार क्षेत्र नम्बर १ मा मोहन आचार्य, क्षेत्र नम्बर २ मा किरण खड्का र क्षेत्र नम्बर ३ मा लाजुराम चौधरी चयन भएका छन् ।
नयाँ जिल्ला नेतृत्व चयन भएसँगै दाङमा संगठन विस्तार, पार्टी सुदृढीकरण र जनसम्बन्ध विस्तारलाई प्राथमिकतामा राखिएको छ ।
जिल्ला नेतृत्वलाई परम्परागत दलका संगठनको पकड तोड्दै रास्वपाका संगठन बनाउने र प्रदेश तथा स्थानीय तह निर्वाचनमा पार्टीलाई विजय गराउने चुनौति खनालमाथि छ ।
जेनजी आन्दोलनपछि भएको प्रतिनिधि सभा निर्वाचनमा रास्वपाका उम्मेदवारहरु दाङका तीनवटै निर्वाचन क्षेत्रबाट विजयी भएका थिए ।
प्रतिनिधि सभा निर्वाचनमा हासिल गरेको जितको श्रृंखला प्रदेश र स्थानीय तह निर्वाचनमा पनि कायम राख्ने चुनौति रास्वपा माथि छ ।
त्यसैले संगठन विस्तारसँगसँगै जनतासँग प्रत्यक्ष भेटघाट एवम् सम्वादका कार्यक्रम सन्चालन गर्ने रास्वपाले जनाएको छ ।
अभियानअन्तर्गत स्थानीयस्तरमा विकास निर्माण तथा सार्वजनिक सेवा प्रवाहसँग सम्बन्धित समस्या पहिचान गर्ने, नागरिकका गुनासा तथा सुझाव संकलन गर्ने र सम्बन्धित निकायको ध्यानाकर्षण गराउने कार्यक्रम पनि सञ्चालन गरिने रास्वपा दाङ सभापति खनालले बताए ।
यसको मुख्य उद्देश्य स्थानीय तह र प्रदेश निर्वाचनका लागि संगठनात्मक आधार तयार गर्ने रहेको रास्वपा दाङका नेताहरु बताउँछन् ।
रास्वपाले यसअघि नै स्थानीय निर्वाचनका लागि उम्मेदवार छनोटको रूपरेखा र ‘क्यान्डिडेट छनोट क्लब’ सम्बन्धी गृहकार्य सुरु गरेको थियो ।
